Pelandai Karung tu leka main ke diparit „puisi moden‟. Nitihka penemu Za‟ba karang „berangkap‟ nya asil betulis ke dikena pengarang mantaika buah runding ke menyana ngena jaku ke badas sereta ngengkahka pemanis jaku ngena tapis ke meruan. Bedududuk ari penemu nya kitai tau madahka pelandai karung nya sebansa karang ke meruan entelian lalu antara entelian nya disaksika munyi ke besenimbal enteli, rentak ke beseriran enggau isi sereta meruan timbang enggau sukat baris tauka pemanjai ayat. Nya alai ari gambar ke disebut, pelandai karung nya karang ke ngenahka pemanah, pemujur enggau pemenyana ti narit ati peninga tauka pemacha. Ngelar Menua Sarawak abi jari Janang Ensiring (1968) nya siti chunto karang pelandai ti keterubah ditulis dalam jaku Iban. Chara bemainka pelandai karung tu semina ngena chara sebut mulut tauka bacha nyaris tang mantang labuh ngagai pemanah munyi enteli leka jaku. Di menua Batang Rajang pelandai karung disebut ngena patah nyawa ti manah didinga kena orang ke tuai-tuai bebuti ngelalaika mayuh macham utai baka utai diempa tauka utai dikena kelebih agi maya begawai. Iya nadai tatak pemanjai tang bepanggai ba kreativiti sida ke melandai
RAMBAN
Ramban nya sebansa leka main pemerindang
ti betukuh ironi tauka sinisme. Ramban suah dibantaika lebuh maya bisi
pengerami tauka gawai ngena sada nyawa ke lundai. Tuju asal endang dikena muji,
meransang tauka mantaika geragayak ati tang dipansutka sechara sindir lembut
sereta ditabakka enggau elemen humor ngambika enda berupai ngempas ngagai
peninga. Pematak jalai nyadaka entelian tema ramban ke lalu disaguka sida ke
ngelembung. Sindir enggau kelugi ti bisi ngasuh ketawa nya manggum mesej ti
ningkuh perangai enggau pemai ulah orang ke diselinting leka ramban. Bisi mega
leka ramban ke mangka uti tundi sida ke bujang enggau dara. Taja munyi ke mejah
pemai ulah tang iya sarat ngundan mesej dediatik. Iya nadai tatak pemanjai tang
bepanggai ba kreativiti sida ke beramban.
DUNGAI
Dungai nya leka main pemerindang ti sama
tuju enggau sanggai, pelandai, sugi enggau ti bukai. Iya disadaka dikena
meransang, mansutka serebana, ngenang pemansang enggau mayuh ke bukai. Orang ke
bedungai mantaika peneleba, peneka sereta pengingin iya ngena patah nyawa
lundai sereta manah didinga.
ENSERA
Ensera nya leka main ke ditusui ngena
tebah nyawa. Bisi mega ensera ke ditusui semina ngena sebut mulut. Ensera ke
ditusui ngena tebah nyawa nya suah agi dikena merindang sida ke nembiak. Tuju
ensera tu endang dikena merindang, meri jaku ajar sereta meransang peninga.
Ambi ke chunto, ensera Telajan nya ensera ke ngenang pemerani, pengering sereta
pemintar. Ari nya orang ke nusui ensera nya nanam ajar manah sereta meransang
peninga beteladanka watak iya.
RENUNG SEMAIN / SUGI SEMAIN
Renung semain enggau sugi semain nya leka
main ke dikena beperindang maya bisi begelumu bebala mayuh, pengerami tauka
gawai. Kedua-dua bansa main tu begenteran panjai lalu disadaka ngena patah
nyawa ke perabubuk panjai mega. Sugi semain nya main sida ke indu. Renung
semain tu main sida ke lelaki. Iya ngeluluka kaul romantis sida ke bujang
enggau dara. Leka renung mega balat ngerinding ati ti randa selampur asa tauka
pengingin enggau peneka ti suah begantung. Renung semain sarat ngundan leka
jaku baru enggau lama ti badas tapis, manis disebut sereta lunak didinga.
Sekeda ari bansa renung semain ianya baka tu, Indu Nerebaika Rampang Bungai,
Indu Mandi, Lelaki Ngayap, Indu Merindang Ati, enggau ti bukai.
GANU
Ganu nya leka main dikena betundi maya
bisi begelumu bebala mayuh, pengerami tauka gawai. Tuju ganu endang sebaka
enggau leka main baka jawang tauka pantun. Iya disadaka dikena muji, meransang,
mansutka serebana, ngenang pemansang enggau mayuh ke bukai. Orang ke beganu
mantaika peneleba, peneka sereta pengingin iya ngena patah nyawa lundai sereta
manah didinga. Suah agi orang ke beganu nya indu tang bisi mega sida
besaut-saut enggau orang ke lelaki. Nyadi tu fitur ti unik senentang ganu.
Orang mayuh balat teperindang lebuh empas leka ganu nya bela mangka ngagai sida
ke lelaki enggau ke indu.
Iya nadai tatak pemanjai tang bepanggai ba kreativiti sida
ke beganu.
JAWANG
Jawang nya leka main dikena bebuti maya
bisi begelumu bebala mayuh, pengerami tauka gawai. Iya disadaka dikena muji,
meransang, mansutka serebana, ngenang pemansang enggau mayuh ke bukai. Jawang
mega chukup unik laban leka iya diselinting nampun ba ati individu tauka orang
ke dituju. Jawang disadaka enggau
pengabis ati nyungkap semua aspek pengidup ti tau ngasuh ati orang runggang
ditabanka empas leka jawang. Bisi mayuh bansa jawang baka: Jawang Sinu Ati,
Jawang Puji, Jawang Peransang, Jawang Serebana enggau mayuh ke bukai. Jawang tu
main orang ke indu. Ari nya mayuh pekara ke dilamun geragayak ati sida ke indu
suah tebantai nengah leka jawang. Iya nadai tatak pemanjai tang bepanggai ba
kreativiti sida ke bejawang.
PANTUN BULAN
Pantun Bulan nya leka main ke ditengkebang
Dunging anak Gunggu (1904 -1985) ari Ng. Ulai, Ulu Rimbas. Iya sebengkah leka
main ke chukup unik sereta disadaka ngena patah nyawa lundai. Pantun Bulan
nyeritaka pengawa nitihka ripih hari enggau bulan bumai betaun. Iya ukai semina
naka nerangka pengawa ke patut dikereja lebuh bumai betaun tang mungkur penemu
pasal adat kitai Iban. Pia mega, ari sukut saintifik kitai tau madahka
penengkebang tu meretika kaul musin, bulan, bintang ke dilangit enggau penumbuh
semua utai tanam baka padi, rampu, lingkau enggau ti bukai. Pantun Bulan endang
signifikan bendar ngagai pengeras bansa Iban ngidupka diri ngena chara bumai
betaun. Taja pan pantun tu dikena beperindang tang mesej ke dalam agi iya nya
bansa Iban patut bagas, landik, kering ati sereta ngembuan disiplin ke tinggi
lebuh ngereja sebarang pengawa.
DINDANG
Dindang nya leka main ke datai ari
serangkap daya idup bansa Melayu. Iya masuk ngagai daya idup bansa Iban ke diau
bekampi tauka besemak enggau bansa Melayu. Penindang tauka saih dindang belagu
sereta nempap rebana ti disaut pangkung tawak. Gemerang ransing asai ati ninga
gendang tanda ke disaguka ngena leka dindang. Nya ti ngasuh orang angkat lalu
betanda. Orang ke betanda tau bepasang tauka beraban. Leka dindang saih dindang
mansa pekara ke besangkut paut enggau peneleba, peneka enggau pengingin iya
empu. Suah mega leka dindang nya mangka perangai, pemai ulah enggau cherita
batang tubuh orang ke dituju. Kala mega leka dindang disurungka dikena manjuk pengerindu
sida ke lelaki ngambika mansutka geragayak ati. Ari nya, bisi seketa maya
lelaki ke angkat betanda nya tadi tau berasai gidan lalu ngujungka besaut-saut
(betimbak) enggau saih dindang mantaika pengingin ati diri. Nyadi tu chara
beperindang ti balat ngerinduka ati. Kala orang berengkah bedindang enggau
betanda ari pun lemai nyentuk ke pagi lebuh melah pinang enggau pengerami
bukai. Bisi dua bansa dindang, dindang dua baris enggau empat baris.
PANTUN
Pantun nya leka main ke balat ngeruntun
ati orang ke ninga. Iya ulih dikena mantaika puji sereta basa, penyinu tauka
pengaga, nyumpah tauka beterima kasih sereta ngenataika peminta, peneka enggau
pengingin. Nyadi nya elemen ke ngasuh pantun chukup unik laban leka pantun
diselinting nampun ba ati individu tauka orang ke dituju. Pantun disadaka
enggau pengabis ati nyungkap semua aspek pengidup ti tau ngasuh ati orang
runggang ditabanka empas leka pantun. Taja pia, bisi sekeda pantun nya endang
semina dikena bebuti, beperindang sereta meransang pengerindu ti benung
bebungai ba ati sida ke bujang enggau dara. Suah mega pantun disadaka sida ke
dara meransang bala sida ke bujang ngirup tuak maya bisi pengerami tauka gawai.
Nyadi leka pantun ke bansa tu ditusun nitihka peneleba,
pengingin tauka juluk ati pemantun.
HOMOGRAF - Leka jaku ti sebaka sepil tang enda sebaka sebut
1. Mata - Leka mata / buah mata bedau mansau
2. Beli - ulah ti beli / beli gari
3. Peti - pajuk jelu iya peti / peti alai nyimpan gari
4. Nganti - nganti barang ngena duit / nganti orang
5. Nganu - Nganu orang / madahka orang enggau jaku ajar/jaku padah
6. Raga - pagar / dikena mai sayur
7. Baka - alai engkah sirih enggau pinang / jaku sema
8. Mali - utai ti enda tau dikereja / berubah gamal
9. Pending - ninga sereta mending / pending ti lekat ba pala
10. Lalu - ngelaluka penatai / mansa