Pelandai Karung tu leka main ke diparit „puisi moden‟. Nitihka penemu Za‟ba karang „berangkap‟ nya asil betulis ke dikena pengarang mantaika buah runding ke menyana ngena jaku ke badas sereta ngengkahka pemanis jaku ngena tapis ke meruan. Bedududuk ari penemu nya kitai tau madahka pelandai karung nya sebansa karang ke meruan entelian lalu antara entelian nya disaksika munyi ke besenimbal enteli, rentak ke beseriran enggau isi sereta meruan timbang enggau sukat baris tauka pemanjai ayat. Nya alai ari gambar ke disebut, pelandai karung nya karang ke ngenahka pemanah, pemujur enggau pemenyana ti narit ati peninga tauka pemacha. Ngelar Menua Sarawak abi jari Janang Ensiring (1968) nya siti chunto karang pelandai ti keterubah ditulis dalam jaku Iban. Chara bemainka pelandai karung tu semina ngena chara sebut mulut tauka bacha nyaris tang mantang labuh ngagai pemanah munyi enteli leka jaku. Di menua Batang Rajang pelandai karung disebut ngena patah nyawa ti manah didinga kena orang ke tuai-tuai bebuti ngelalaika mayuh macham utai baka utai diempa tauka utai dikena kelebih agi maya begawai. Iya nadai tatak pemanjai tang bepanggai ba kreativiti sida ke melandai
RAMBAN
Ramban nya sebansa leka main pemerindang
ti betukuh ironi tauka sinisme. Ramban suah dibantaika lebuh maya bisi
pengerami tauka gawai ngena sada nyawa ke lundai. Tuju asal endang dikena muji,
meransang tauka mantaika geragayak ati tang dipansutka sechara sindir lembut
sereta ditabakka enggau elemen humor ngambika enda berupai ngempas ngagai
peninga. Pematak jalai nyadaka entelian tema ramban ke lalu disaguka sida ke
ngelembung. Sindir enggau kelugi ti bisi ngasuh ketawa nya manggum mesej ti
ningkuh perangai enggau pemai ulah orang ke diselinting leka ramban. Bisi mega
leka ramban ke mangka uti tundi sida ke bujang enggau dara. Taja munyi ke mejah
pemai ulah tang iya sarat ngundan mesej dediatik. Iya nadai tatak pemanjai tang
bepanggai ba kreativiti sida ke beramban.
DUNGAI
Dungai nya leka main pemerindang ti sama
tuju enggau sanggai, pelandai, sugi enggau ti bukai. Iya disadaka dikena
meransang, mansutka serebana, ngenang pemansang enggau mayuh ke bukai. Orang ke
bedungai mantaika peneleba, peneka sereta pengingin iya ngena patah nyawa
lundai sereta manah didinga.
ENSERA
Ensera nya leka main ke ditusui ngena
tebah nyawa. Bisi mega ensera ke ditusui semina ngena sebut mulut. Ensera ke
ditusui ngena tebah nyawa nya suah agi dikena merindang sida ke nembiak. Tuju
ensera tu endang dikena merindang, meri jaku ajar sereta meransang peninga.
Ambi ke chunto, ensera Telajan nya ensera ke ngenang pemerani, pengering sereta
pemintar. Ari nya orang ke nusui ensera nya nanam ajar manah sereta meransang
peninga beteladanka watak iya.
RENUNG SEMAIN / SUGI SEMAIN
Renung semain enggau sugi semain nya leka
main ke dikena beperindang maya bisi begelumu bebala mayuh, pengerami tauka
gawai. Kedua-dua bansa main tu begenteran panjai lalu disadaka ngena patah
nyawa ke perabubuk panjai mega. Sugi semain nya main sida ke indu. Renung
semain tu main sida ke lelaki. Iya ngeluluka kaul romantis sida ke bujang
enggau dara. Leka renung mega balat ngerinding ati ti randa selampur asa tauka
pengingin enggau peneka ti suah begantung. Renung semain sarat ngundan leka
jaku baru enggau lama ti badas tapis, manis disebut sereta lunak didinga.
Sekeda ari bansa renung semain ianya baka tu, Indu Nerebaika Rampang Bungai,
Indu Mandi, Lelaki Ngayap, Indu Merindang Ati, enggau ti bukai.
GANU
Ganu nya leka main dikena betundi maya
bisi begelumu bebala mayuh, pengerami tauka gawai. Tuju ganu endang sebaka
enggau leka main baka jawang tauka pantun. Iya disadaka dikena muji, meransang,
mansutka serebana, ngenang pemansang enggau mayuh ke bukai. Orang ke beganu
mantaika peneleba, peneka sereta pengingin iya ngena patah nyawa lundai sereta
manah didinga. Suah agi orang ke beganu nya indu tang bisi mega sida
besaut-saut enggau orang ke lelaki. Nyadi tu fitur ti unik senentang ganu.
Orang mayuh balat teperindang lebuh empas leka ganu nya bela mangka ngagai sida
ke lelaki enggau ke indu.
Iya nadai tatak pemanjai tang bepanggai ba kreativiti sida
ke beganu.
JAWANG
Jawang nya leka main dikena bebuti maya
bisi begelumu bebala mayuh, pengerami tauka gawai. Iya disadaka dikena muji,
meransang, mansutka serebana, ngenang pemansang enggau mayuh ke bukai. Jawang
mega chukup unik laban leka iya diselinting nampun ba ati individu tauka orang
ke dituju. Jawang disadaka enggau
pengabis ati nyungkap semua aspek pengidup ti tau ngasuh ati orang runggang
ditabanka empas leka jawang. Bisi mayuh bansa jawang baka: Jawang Sinu Ati,
Jawang Puji, Jawang Peransang, Jawang Serebana enggau mayuh ke bukai. Jawang tu
main orang ke indu. Ari nya mayuh pekara ke dilamun geragayak ati sida ke indu
suah tebantai nengah leka jawang. Iya nadai tatak pemanjai tang bepanggai ba
kreativiti sida ke bejawang.
PANTUN BULAN
Pantun Bulan nya leka main ke ditengkebang
Dunging anak Gunggu (1904 -1985) ari Ng. Ulai, Ulu Rimbas. Iya sebengkah leka
main ke chukup unik sereta disadaka ngena patah nyawa lundai. Pantun Bulan
nyeritaka pengawa nitihka ripih hari enggau bulan bumai betaun. Iya ukai semina
naka nerangka pengawa ke patut dikereja lebuh bumai betaun tang mungkur penemu
pasal adat kitai Iban. Pia mega, ari sukut saintifik kitai tau madahka
penengkebang tu meretika kaul musin, bulan, bintang ke dilangit enggau penumbuh
semua utai tanam baka padi, rampu, lingkau enggau ti bukai. Pantun Bulan endang
signifikan bendar ngagai pengeras bansa Iban ngidupka diri ngena chara bumai
betaun. Taja pan pantun tu dikena beperindang tang mesej ke dalam agi iya nya
bansa Iban patut bagas, landik, kering ati sereta ngembuan disiplin ke tinggi
lebuh ngereja sebarang pengawa.
DINDANG
Dindang nya leka main ke datai ari
serangkap daya idup bansa Melayu. Iya masuk ngagai daya idup bansa Iban ke diau
bekampi tauka besemak enggau bansa Melayu. Penindang tauka saih dindang belagu
sereta nempap rebana ti disaut pangkung tawak. Gemerang ransing asai ati ninga
gendang tanda ke disaguka ngena leka dindang. Nya ti ngasuh orang angkat lalu
betanda. Orang ke betanda tau bepasang tauka beraban. Leka dindang saih dindang
mansa pekara ke besangkut paut enggau peneleba, peneka enggau pengingin iya
empu. Suah mega leka dindang nya mangka perangai, pemai ulah enggau cherita
batang tubuh orang ke dituju. Kala mega leka dindang disurungka dikena manjuk pengerindu
sida ke lelaki ngambika mansutka geragayak ati. Ari nya, bisi seketa maya
lelaki ke angkat betanda nya tadi tau berasai gidan lalu ngujungka besaut-saut
(betimbak) enggau saih dindang mantaika pengingin ati diri. Nyadi tu chara
beperindang ti balat ngerinduka ati. Kala orang berengkah bedindang enggau
betanda ari pun lemai nyentuk ke pagi lebuh melah pinang enggau pengerami
bukai. Bisi dua bansa dindang, dindang dua baris enggau empat baris.
PANTUN
Pantun nya leka main ke balat ngeruntun
ati orang ke ninga. Iya ulih dikena mantaika puji sereta basa, penyinu tauka
pengaga, nyumpah tauka beterima kasih sereta ngenataika peminta, peneka enggau
pengingin. Nyadi nya elemen ke ngasuh pantun chukup unik laban leka pantun
diselinting nampun ba ati individu tauka orang ke dituju. Pantun disadaka
enggau pengabis ati nyungkap semua aspek pengidup ti tau ngasuh ati orang
runggang ditabanka empas leka pantun. Taja pia, bisi sekeda pantun nya endang
semina dikena bebuti, beperindang sereta meransang pengerindu ti benung
bebungai ba ati sida ke bujang enggau dara. Suah mega pantun disadaka sida ke
dara meransang bala sida ke bujang ngirup tuak maya bisi pengerami tauka gawai.
Nyadi leka pantun ke bansa tu ditusun nitihka peneleba,
pengingin tauka juluk ati pemantun.
HOMOGRAF - Leka jaku ti sebaka sepil tang enda sebaka sebut
1. Mata - Leka mata / buah mata bedau mansau
2. Beli - ulah ti beli / beli gari
3. Peti - pajuk jelu iya peti / peti alai nyimpan gari
4. Nganti - nganti barang ngena duit / nganti orang
5. Nganu - Nganu orang / madahka orang enggau jaku ajar/jaku padah
6. Raga - pagar / dikena mai sayur
7. Baka - alai engkah sirih enggau pinang / jaku sema
8. Mali - utai ti enda tau dikereja / berubah gamal
9. Pending - ninga sereta mending / pending ti lekat ba pala
10. Lalu - ngelaluka penatai / mansa
Pengajar Rinya
Aku agi ingat pasal hari keterubah Pengajar Rinya Nyuntai masuk kelas kami Pom 3 Biru. Maya nya, iya ngena baju kebaya sereta mai fail bechura mirah jera ti endang ngipakka chura kebaya ti dikena iya. Maya iya tama, mayuh ari bala kami ke lelaki ti duduk muak ke belakang kelas, nyau bekiu-kiuka pangan diri ngena siku meda gaya Pengajar Rinya.
Tubuh iya ruri sereta umbas iya peninggi. Kulit iya burak kuning lensat. Bok iya panjai sereta rurus. Ari serengus nyawa iya nyambut tabi selamat ari kami, kami lalu jampat ngelala iya ti ukai pengajar ke semina bajik gamal tang mega tentu terit bepegai ba prinsip idup pengajar rebak baru. Pengajar Rinya tu siku pengajar mata pelajar Matematik ti chukup mayuh penemu setipak enggau ijazah ti dikembuan iya.
Maya ngajar, iya chukup kreatif. Iya enda bepangai ba chuk enggau papan tulis tang ngena mayuh Macham teknik ti jarang dikena pengajar bukai. Ketegal nya, dia pengawa belajarka Matametik ba kelas kami nyadi mudah. Kami belajar baka ke bemain tang taja pia, kami nadai penangul meretika mayuh konsep ti diasaika kami mar ngelama tu. Pengeransing gaya enggau chara iya ngenataika isi pelajar enda berasai ngerapatka kami sekelas. Sebengkah pekara ti balat bendar narit ati aku ba Pengajar Rinya nya pengerurus ati iya.
Enti iya enda ulih mutarka penanggul, iya madah terus terang, tang iya enda kala puntan daya nulung kami ngiga jalai mutarka penanggul kami. Pengajar Rinya mega siku pengajar ti berani negika pengamat. Iya enda sangu nulung kami enti kami bisi penanggul. Ambi ke banding, bisi sekali sekula deka ngatur pengerami lumba darat sama maya enggau peresa penggal sekula. Kami balat enda tantang ati laban lumba nya tau ngasuh kami udu lelak sereta ngacau kami belajar. Kami madahka serebana diri ngagai Pengajar Rinya. Iya lalu mai pekara nya ngagai Pengetua. Kami puas ati lebuh Pengetua nangguhka maya hari lumba nya ngagai maya bukai. Agi mega, iya tu siku pengajar ti bepegai ba prinsip, kereja mayuh agi ari bejaku.
Maya minggu sains enggau matamatik, Pengajar Rinya naka pemendar nguluka kami ngaga projek Mini Hidro. Iya mega landik bekomunikasi enggau Pengetua. Ketegal nya dia Pengetua nadai sanggu meri kami semua kereban ti patut dikena kami nembuka projek nya. Sebengkah agi pemanah Pengajar Rinya nya bekaul enggau pengarap ati iya ba semua kami sekelas. Ba iya, semua kami sekelas endang bisi pengulih magang ba mayuh Macham bidang pelajar. Ketegal nya dia kami mudah benar tekuing ati deka nguji bebendar dalam semua aktiviti ti diambi kami. Aku agi ingat, sebedau iya datai aku chukup kurang dalam mata pelajar Matematik. Pengurang aku ba mata pelajar nya bepun ari ti mayuh penanggul di rumah.
Lebuh
nemu penggul aku, Pengajar Rinya lalu mai aku betemu enggau pengajar
kaunseling. Udah bekau berandau enggau pengajar kaunseling, dia aku berubah
runding sereta belabuh ransing ati belajar. Pemanah pelajar aku mega ngejut
niki. Enti sema aku badu semuka dudi hari, aku tetap ingat ke pemanah Pengajar
Rinya. Iya meh pengajar chunto ba aku. Aku meri terima kasih ngagai Petara
ketegal meri aku peluang kena ajar Pengajar Rinya. Arapka petara mega nyaga iya
belama.
Tepawah
“Aram…! Mandi tua ju. Enggaika tua laun lagi,” Jennifer nyapai beledi ari baruh katil iya lalu merening mua aku.
“Aahh! Alai meh dulu… kelalah amat asai
tu”, saut aku, lembau. Baru iya aku enda sereta iya mandi. Enda kala aku enggai
dibai iya. Ngelama tu enti mandi sama mandi. Enti nurun makai sama seretai. Kekadang
saum pingai kami duai. Entah nama kebuah sahari tu aku nyau berasai berubah pikir?
Ati aku majak enda nyamai asai. Enda kala pikir aku asai tu. Runding aku charut
bepusin nanin. Lelubah singkang Jeniffer pansut ari bilik no.4 Asrama melor
udahka lama gegenung meratika mua aku. Panchar perening bala pangan sebuding
aku ke bukai mega asaika ngerayap gegemut ba mua aku. Mata Melisa, Dorina pan
enggai pepulai ari mua aku. Kumbai sida iya enda nemu diri aku, kini? Sida meratika
mua aku. Tang aku sengaja enda nemu diri ulah sida. Majak aku nyilak-nyilak
macha sekeda topik ti betulis tebal sereta bechura-chura ba majalah. Lama mata
aku tesangkut ba lambar 18-20. Bisi ati aku deka ngirupka serebana ati diri ba
rawang tu. Ila meh. Enti enda diatu, sapa orang nemu peragam ati aku? Ati aku
rugang, nadai penguang. Pikir aku selalu tepagang ba ruang ke nadai utai. Kelalu
suah pikir aku datai baru nuju sebuah makmal sains.
Udah kelas tambah Pengajar Leo pukul
4.00 lemai nya aku enggau Jennifer endang udah dipaduka kami sekelas nuchi
sereta ngemas makmal nya ninting hari Tiga.
“Indai nuan ke datai tadi neh Julia?”
“Iya meh nya. Nama, deh?”
“Ooo… patut meh nuan bajik murihka indai
nuan…!” saut Pengajar Leo. Aku malik enda lama ngagai mua iya. Tang iya enda
malik ngagai aku. Iya majak nulis sambil merening sekejap-sekejap ngagai
botol-botol kacha ti diisi mayuh Macham bansa kimia.
Apuuu..!
kesal amat ati aku. Asaika dipandam dada.
Tungkul ati aku kekebak penuh pengarap. Enda
berasai aku bejaku kediri dalam ati. Kain basah ti agi aku gengam enda ngetu
kekebas ba atas mija.
“Peeecccccssssshhhh!
Betemera kerimpak kacha gelas ba geladak
semin. Tekenyit amat aku. Sempat ga aku malik ngagai Jennifer. Iya mega
tekenyit tekala nya. Sekepin cheremin jendila ti benung dilap iya nyau deka
techabut.
“Ooo…! Mati… mati … ti…!” Jennifer
nyebut utai sengapa. Latah. Kerusi alai iya bediri tadi beguyat-guyat. Nayu deka
tumbang asai nya tadi. Kini ke mata aku enda meda gelas nya tadi?dua iti gelas
kacha di atas mija tadi lesap sekejap mata.
“Min … mim … ta ampun pengajar. A… a…
aku enda sengaja. Enda meda…”
“nya meh anang nyual mata! Nuan buta?
Neh? Sapa deka nganti nya?!” besai munyi nyawa Pengajar Leo nganu aku. Apuuu! Baru
sekali tu aku ninga jaku jai iya pansut ari mulut iya. Gesak asai dada aku. Nadai
nyangka iya kempang mansut ke jaku ngenyai nya ba mua aku. Pedis amat ati iya,
kini? Enda patut. Aku deka nyelam tasik ati iya lebih dalam agi. Enda liat asai
ati aku nganti luching memunyi pukul 7 malam nya.
Milih Profesion
Nyauka tiap-tiap iku mensia di dunya tu bisi pengawa tauka kereja kena ngidupka diri. Pengawa tauka kereja tu dikumbai profesion. Nitihka penemu Mohd. Mansur Abdullah, 1986 profesion nya dikumbai iya bidang kereja ti dikemeran orang siku-siku dalam pengidup iya. Merambu sereta milih profesion nya siti ari proses pengelandik belajar seumur idup mensia.
Kenu ku Ginzberg enggau
super, proses milih profesion tu bisi tiga renggat baka fantasi, tentative enggau
realistic. Renggat fantasi berengkah ba nembiak ti beumur 6 ngagai 11 taun. Maya
tu sida milih profesion diri bepelasarka pengawa orang besai tuai ti ngelingi
sida, tang sida enda tentu mereti pengawa orang nya.
Ba renggat tentative nembiak
merambu pilih sida belalauka pengerindu sereta hobi diri maya sida beumur 15
ngagai 16 taun. Ba renggat tu nembiak berengkah nyediaka diri masuk sekula
tinggi tauka nganbi kus professional ti engkeman ba juluk ati diri.
Ba renggat realisik benung
bap om 6 tauka udah ngambi kus diploma ba university. Ba renggat tu sida suah
minta tulung pengajar tauka kaunselor nerangka sida mayuh bengkah profesion.
Bala nembiak patut bisi
juluk ati ngembuan profesion ti manah, ti engkeman ba pemandai enggau aras
pengelandik diri. Nembiak mega mensti pandai tauka ngelangur profesion ke
ungkup diri. Anang nebang tapang ngena lunga, anang nubai sungai ngena lia. Maya
agi sekula bala nembiak diatu patut bisi juluk ati. Nembiak patut netapka
profesion nitihka ati diri. Udahnya baru nyeremin diri. Pansik tukuh tubuh,
mental enggau emosi diri. Nama pengelandik diri enggau pemandai ti bisi
dikembuan diri? Nama pengawa ti ulih dikereja diri? Pansik mega pengelemi
enggau pengurangt diri. Asuh pangan diri meri komen pasal personality nuan. Udah
nya, uji buai pengelemi enggau pengurang nya. Uji ubah ulah enggau perangai ti
enda manah nya awakka nadai endur mantah. Udah nya baru ngiga data sereta
penerang pasal bidang kereja ti dijuluk ati. Bandingka penerang enggau data nya
enggau personality diri empu.
Udah nya baru nembiak
nyediaka diri belajar bebendar ambika bulih pemutus peresa ti manah ba PMR
enggau SPM. Enti pemutus peresa manah nembiak deka bisi peluang diberi biasiswa
dikena masuk university ngambi diploma tauka degree. Udah pansut ari university
ila pandai-pandai meh milih agensi ti manah endur nuan gawa nitihka profesion
ti udah dipilih diri empu.
Pangan Serambau
Matahari pagi nya gaga rising-rising
mancharka penampak iya ke dunya tu. Makin lama makin angat panchar iya
beperechi nyelepak cheremin mua empelua kelas 3A. sekeda ari tempiak perenchi
nya inggap begadai-gadai ba kulit enggau baju aku sereta tiga iku nembiak
lelaki bukai ke duduk ba belakang ba tisi penjan.
Ba mua kami bisi enam iku nembiak indu ti benung diau jenuh mendingka ajar Pengajar Lugat. Muak ari kiba kami bisi lima
baris mija enggau kerusi ti benung endur nembiak bukai duduk. Tiap-tiap baris
ngundan lima iti mija enggau kerusi ti semiana siti aja enda diuan orang. Kami sekelas
bela sengian sereta enda tetilap
beratika mua pengajar nya. Maya ke bejaku, ngelengak sekejap-sekejap ga
Pengajar Lugat merening ngagai tiga iti kipas ti kating-kating ba siling semin
mendaun pisang musa. Empai ga bepusin kipas nya. Suah ga perening Pengajar
Lugat tekait ba ulah Jubang ti selalu bendar malik baka ke deka ngitung kerita
ti nengah jalai raya din. Suah aku nelai Jubang enda ngasuh merening ke luar
kin.
“Eh,
peda nuan nyau kuring mata pengajar merening kitu!” ku aku nelai iya baru sambil
enda engkesap beratika mua Pengajar Lugat ti benung bebendar nuangka penemu iya
ngagai kami. Baru udah nyigul rusuk Jubang siku kanan aku, dinga nyaris sereta
siru tanya Pengajar Lugat.
“Chambai!
Jubang! Nama utai dikerandauka seduai?” tak semua mata kami sekelas lekat ba
kami duai. Asaika dipandam dada diperening orang baka nya. Nya utai dikeenggai
nya ga datai.
“Aku
minta ampun pengajar. Aku nagang Jubang malik ke jalai alun tang iya enda
mending.” Tak semadi asai aku mansutka jaku.
“Au
neh. Duduk nuan. Nama utai diengkining
nuan kin deh, Jubang?”
“Nyanau,
pengajar. Nyin iya… .”
Nyanau?
Lapa Nyanau? Panjai singkang Pengajar Lugat nuju mua jendila lalu merening ke
luar. Amat bisi ayan kemayang Nyanau din. Maya nya mega jampat palik aku nuju
siti kerusi ti puang dia. Baru aku ingat semina Nyanau aja ke enda datai pagi
nya. Aku ngenchuri nyeling dua iku
nembiak ti benung kayo-kayo ba kedai
seberai din. Sayau pemandai Nyanau nitihka ulah Jamit nya. Agi begulai enggau
kami duai Jubang pun taun suba enda iya kala ngaga ulah ti jai baka nya. Puas aku
bekira deka ngumbuk Nyanau nikal ngagai pun jalai baru.
“Nya
meh. Kala ke kita baru belajarka topik tu, ulah Nyanau nyin tau bendar nyadi tangkan semua kiat. Kasih iya dirampit ulah Jamit seduai Saging nya. Sebedau
tu suah aku ngelalau kita bejimat-jimat milih pangan enggau segulai sejalai. Nadai
kala Nyanau teruan sebedau tu. Jamit
enggau Saging ukai semina suah ditangkap pengajar disiplinpunting sekula tang
seduai mega bisi ditemu nginsap, bejudu enggau enchuri. Aku arapka kita enda
begulai enggau nembiak ke bakanya.” Panjai simpul ajar Pengajar Lugat sebedau iya pansut ari kelas kami pagi
nya. Kami sekelas beperening-perening diri sama diri bepikirka jaku pengajar
nya.
Telih Lama Diana
Pagi nya aku tumu dani. Apai enggau indai tumu agi ari aku laban bekemaska perengka ti deka dibai. Kami mupuk ngena kerita nuju tebing tasik ti selalu endur kami memarin. Indai duduk ba belakang. Aku duduk ba mua laban deka ngambi gambar ngenisi jalai ti deka dikena aku ngaga folio mata pelajar geografi.
Ba
rantau jalai, apai aku masang radio. Maya pagi baka nya, sigi mayuh meh info
tauka berita. Baka ke selama, enti dalam kerita aku udah liri bendar bekenaka
aplikasyen ba telefon binching aku. Baru deka ngena speaker pending ninga lagu,
apai aku lalu bejaku.
“Diana
kitai tu bejalai diri sebilik. Enti pending kitai nyau disempal speaker pending
nya, baka ni kitai tu ulih berandau diri sebilik deh? Udah ga nuan selalu
bekurung ba bilik belajar,” pia ku jaku apai ngerara aku. Udah nya, iya lalu
masang radion inggar agi. Aku nyangka apai ringat ngagai aku. Enda nemu nya
bisi program pasal mulaika pengigat pasal tanah berenyang ti bisi nyadi ba
menua kami suba. Kami tiga sama bela nadai bejaku tang semina temati kutu ninga
program nya sepemanjai jalai. Ketungkah nya, runding aku lalu tekuing. Piker aku
lalu tepawah jauh ngigat ngagai tasah nya suba, dalam ati aku semampai besampi
ngicaka menua kami tau selamat ari penusah ti chukup ngeruga ati. Nya meh munyi
jaku sempama, ngarapka pisang enda bebuah dua kali.
Aku
agi ingat maya nya suba, kami duai Elvin tesepit ba selepak dinding rumah kami
ti runtuh. Maya nya aku enda nemu utai sekali. Sehari udah nya, baru aku
ngeleda. Sampai ke diatu, aku agi nyimpan gambar raban penyah penusah ari menua
Malaysia enggau Jipun ti benung bepas was ngulihka tubuh kami duai menyadi ari
selepak dinding. Aku agi ingat maya nya, kami duia menyadi benung meri mayau
makai ba tingkat baruh rumah kami. Apai enggau indai aku sama bela nadai ba rumah
laban bisi ngulu aum mayanya. Aku beterima kasih ngagai penyah penusah ari
menua bukai baka ari menua Australia, New Zealand, Jipun, Amerika enggau mayuh
agi. Taja pan kami sebilik selamat tang aku mengkang sinu ati ngigatka bala
bakih ti sekelas enggau aku ti mayuh lesi bebadi. Lebuh ngigatka bala bakih aku
ti midang nya, sigi luluh asai ati tang nya meh sigi pekara ti nyadi ngajar
akau reti pemesai kaul mensia ba baruh dunya injau tu nadai ngira chura kulit,
bansa enggau menua.
Nya
alai, dalam lubuk ati aku tu semampai ngasaika beruntung budi ngagai raban
penyah penusah menua aku empu sereta menua bukai ti sampal datai. Mayuh Macham bantu
baka pemakai, ubat, gari kelabi enggau mayuh agi diberi enggau chukup maya nya.
Aku berasai temegah ati naggai menua aku laban ngembuah kaul global ti manah. Mauh
menu aba kandang menua ASEAN enggau menua Komanwel bisi datai matu maya nya. Aku
agi ingatka siku kaunselor ari Malaysia ti benama Dr. Andrian Balan. Iya chukup
siru enggau aku maya aku ti benung trauma tauka jeda. Aku mega meri terima
kasih ngagai ba doctor ari menua bukai ti mantu menua kitai mayanya.
“Diana,
dani nuan. Udah mih nya. Aram!” pia ku apai ngagau aku laban udah data ba endur
memarin. Enda berasai ga mata aku telelap ninga program radio nya tadi. Taja pan
pengigat ti nyayat ati tu ulih dilamun aku tang maya ti tesat runding kala aku
nanya diri empu, baka ni penyadi kami duai menyadi enti enda diselamatka bala
raban penyah penusah entarabansa.
Lalau Nyadi Penguna Pintar
Keterubah kitai mesti nyediaka lis barang ti deka dibeli sebedau nurun ke pasar. Nya alai kitai mesti nitihka lis ti udah digaga lebuh meli barang. Ngena nya mega kita enda meli barang sepeneka ati. Ari nya tai kitai ulih nyeliahka diri ari ke meli barang ke enda tentu diguna.
Kelimpah ari nya, kitai patut nyaga anggar penyampau duit ti deka dikena. Kitai enda patut mai duit ti kelalu mayuh. Kad kredit semina tau dikena maya ke patut aja. Mai duit ti enda kelalu mayuh lebuh ti mindah ke pasar ulih nyeliahka kitai ari ti rua ngena belanja.
Lebuh kitai bebelika
barang, kitai patut ngaga banding rega barang sebedau meli barang nya. Kadang-kadang
barang ba kedai enda sebaka, bisi nya mar lalu bisi nya murah. Taja pia kitai
meratika mega kualiti barang ti deka dibeli. Anang semina meli barang ti nadai
kualiti ketegal reg
a ti murah. Kitai mesti nemu manding ari segi rega ti murah
tang mega ari segi kualiti.
Nyadi penguna pintar ulih nyeliahka kitai ari dipenyati orang ti bedagang. Kitai paput nemu semua hak penguna. Semua kitai patut nemu reti leka jaku penguna. Penguna nya mai reti orang ti ngena barang tauka servis enggau sumber semula jadi. Bisi lapan hak pengguna ti patut ditemu kitai:
1. Hak bisi pekara pun penyanding pengidup – Hak bulih pekara pun penyanding pengidup enggau servis ti chukup baka pemakai, gari, endur diau, pengerai enggau pemeresi.
2. Hak bisi pengelikun – Hak dijamin nerima barang ti manah enggau nerima servis ti enda ngerua pengelikun pengerai enggau pengidup penguna.
3. Hak bulih informasyen – Hak dijamin ari pemandang dagang tauka label ti ngasuh saru, enda lurus tauka nipu. Hak bulih fakta enggau informasyen ti betul ngambika ulih milih barang enggau betul.
4. Hak milih kediri empu – Hak milih barang enggau servis kediri empu enggau rega ti patut lalu bisi jamin kualiti ti manah.
5. Hak nerima ganti rugi – Hak ulih nerima ganti rugi enti nerima berita ti nipu, barang enda manah kualiti enggau servis ti enda menyana.
6. Hak meri penemu – Penguna bisi hak meri penemu diri empu tauka ngena pengari ngambika buah runding sida didinga lalu diambi kira dalam ngaga atur perintah. Penguna mega patut bisi hak mantaika sebana.
7. Hak belajarka penemu penguna – Hak belajarka penemu enggau pengelandik dalam pekara penguna ngambika ulih nyadi penguna ti pintar.
8. Hak diau ba rampa menua ti bepengerai – Hak ulih diau enggau bekereja ba endur ti menyana, enda ngasuh bebadi lalu ulih idup gerai nyamai sereta likun.
Serungkai jaku
|
Bayam |
Rindang sereta
rindumeratika sesebengkah pekara |
|
Bechiping |
Ngembuan penemu ti
enda rentang dalam sesebengkah pekara |
|
Bedunju |
Pengawa belangkau arau |
|
Begemung |
Munyi |
|
Abi |
Bekau |
|
Bekedumu |
Munyi orang berandau
enda inggar |
|
Belabaka |
Nyangka |
|
Belangi |
Tanda bansa bidayuh |
|
Belidau
|
Senduk besai |
|
Besengki
jaku |
Belaya ngena jaku |
|
Betelayut |
Betekibing |
|
Betunggah |
Bekangau |
|
Bepuakka
|
Bepanggai penuh |
|
Daluh |
Tanah paya ke enda
nyenggala besai ti kena kepit dua tauka tiga munggu |
|
Dilempai |
Pengawa ngengkah objek
lemi baka kain tauka rentang tali |
|
Disagu |
Dikesai jauh |
|
Ditatak |
Disekat |
|
Diuan |
Diau mendam di
sesebengkah endur |
|
Disempulangka |
Dikelampungka |
|
Enchabar |
Tusah tauka mar |
|
Entrepreneur |
Orang dagang |
|
Enchelapka |
Ngisi perut |
|
Engkani |
Meri jelu Makai |
|
Engkelait |
Bansa utai tumbuh beaker,
sedi |
|
Ensuruk |
Bejalai ngenduk laban
nyeliahka sesebengkah objek |
|
Entapu |
Bungai ti baru
ngerembai pansut ari kuntum iya |
|
Fauna |
Jelu |
|
Flora |
Utai tumbuh |
|
Forum |
Pengawa bejuraika
sesebengkah isu bemalinka panel ti udah ditetapka |
|
Gegining |
Malik kiba kanan
mertika utai |
|
Gela |
Gelar, ensumber |
|
Gelana |
Fenomena astronomi ke
nyadi lebuh sesebengkah objek singka miga kena lindung |
|
Generasyen |
Rebak |
|
Intergrasyen |
Kaul |
|
Jebul |
Butul tauka balang |
|
Kampung
dara |
Kampung bedu kala
dirimba |
|
Karam
ba darat |
Angus |
|
Keberuran |
Lama udah enda Makai,
lepi |
|
Kidu-kidu |
Gaya utai ti enda
lurus pejalai laban tubuh iya betikal-tikal ngeliuk |
|
Kelambi |
Baju, gari |
|
Komoditi |
Barang dijual ke nyadi
penatai pemisi |
|
Lenak |
Silik |
|
Lesi
bebadi |
Parai, mati, nadai
kedap agi |
|
Lunak |
Buah ke tebal isi |
|
Malin |
Sanding |
|
Memarin |
Pengawa merindangka
ati ngagai sesebengkah endur manah |
|
Merambu |
Ngaga sadang pengawa |
|
Neresa |
Bejalai nengah babas |
|
Ngadang |
Besedia |
|
Ngali |
Numbak |
|
Ngani
menua |
Nguan menua |
|
Nganyutka |
Ngeraratka |
|
Ngasi |
Ninga jaku |
|
Ngembung |
Ngeruang |
|
Ngejang |
Mupuk bejalai |
|
Ngenkah |
Ngetup utai ngena
ngeli gam |
|
Ngelengak
|
Meda ke atas |
|
Ngemudi |
Ngayuhka perau duduk
di kemudi |
|
Ngentak |
Ngujak, nirika |
|
Ngerara
api |
Madamka api |
|
Ngeruang |
Siti objek puang di
tengah baka langkar perau |
|
Ngesuh |
Nyepu, niup |
|
Ngintu
diri |
Makai |
|
Ngudar |
Pengawa mesan barang
ti deka dibeli |
|
Nimpai |
Merening ari jauh |
|
Nunsung |
Mulaika duit laluh
meli barang |
|
Nyegang |
Mansang |
|
Nyempalangka
|
Nikauka |
|
Nyendi |
Ngimbai |
|
Nyidi |
Nitihka bekau |
|
Nyungkakka
|
Nambah |
|
Meremi |
Ngendukka tubuh |
|
Meali-ali |
Kediri |
|
Panggau |
Geladak tinggi alai
bejalaika pengawa baka belagu, bemain enggau ti bukai |
|
Pegari |
Tebilang |
|
Penanggul |
Penekuh, penusah |
|
Penempa |
Bagi indu tauka lelaki |
|
Pengelicha |
Orang ti ngajar ba university |
|
Penyelai |
Ngembuan panteba ti
enda sebaka |
|
Peranak
|
Rayat menua |
|
Perengka
|
Kereban |
|
Pua
beludu |
Pua digaga ari kain
beludu |
|
Ratan
jalai |
Bekau jalai lama |
|
Reding-reding |
Munyi utai dipalu |
|
Ringgung |
Pekakas bekaki tiga
digaga ari besi alai nanggarka periuk |
|
Rintung |
Tersinsung dikena
ngulurka labit manyi |
|
Rurun |
Tusun |
|
Ruya-ruya |
Gaya pemayuh enggau
pemanjai utai baka pampang tanduk rusa enggau janggut undang |
|
Sepit
besi |
Besi dikena nyepit api |
|
Sadang |
Penemu, tuduh penemu |
|
Sampal |
Enggau magang |
|
Samgkai |
Datai |
|
Sedendang |
Gaya pengangkat ti
ngenyit tauka berumban |
|
Selampur |
Semua |
|
Semeliung |
Bagi tubuh jelu ari
pun punggung ke burit |
|
Sempekat |
Pemutus ti udah
dipesetujuka antara dua iku orang tauka gerempung |
|
Senaya |
Senawah, ayuk |
|
Sengian |
Enda inggar |
|
Seperugan |
Gempung pun buluh ti
tumbuh |
|
Serekun |
Diau diri nadai
bebunyi |
|
Serimbing |
Sepiak bukit ti
betebing renjan |
|
Singka
miga |
Langit luar |
|
Suman |
Gerai |
|
Tasah |
Penusah |
|
Tebangkar |
Landik |
|
Tegar |
Kering tulang |
|
Tejanggal
|
Pengawa ti puntan |
|
Kaju-kaju |
Enda lanchar pejalai |
|
Tegepang |
Tekenyit |
|
Temilah |
Endur engkah laja
sumpit |
|
Tempalai |
Umai sangking |
|
Temuda |
Tanah enggau babasti
udah dipulai, damun tauka mudai |
|
Tepejuh |
Tesat jauh |
|
Terais |
Munyi orang manjung |
|
Tebererak |
Tebabak |
|
Trauma |
Agi takut tauka kesal
ati |
|
Tuchung |
Endur ti pemadu tinggi
ba punjung bukit |
|
Undur |
Ngili ai |
|
Wung |
Ai ti labuh ba endur
ti betingkah, giam |