Tepawah

 

“Aram…! Mandi tua ju. Enggaika tua laun lagi,” Jennifer nyapai beledi ari baruh katil iya lalu merening mua aku.

        “Aahh! Alai meh dulu… kelalah amat asai tu”, saut aku, lembau. Baru iya aku enda sereta iya mandi. Enda kala aku enggai dibai iya. Ngelama tu enti mandi sama mandi. Enti nurun makai sama seretai. Kekadang saum pingai kami duai. Entah nama kebuah sahari tu aku nyau berasai berubah pikir? Ati aku majak enda nyamai asai. Enda kala pikir aku asai tu. Runding aku charut bepusin nanin. Lelubah singkang Jeniffer pansut ari bilik no.4 Asrama melor udahka lama gegenung meratika mua aku. Panchar perening bala pangan sebuding aku ke bukai mega asaika ngerayap gegemut ba mua aku. Mata Melisa, Dorina pan enggai pepulai ari mua aku. Kumbai sida iya enda nemu diri aku, kini? Sida meratika mua aku. Tang aku sengaja enda nemu diri ulah sida. Majak aku nyilak-nyilak macha sekeda topik ti betulis tebal sereta bechura-chura ba majalah. Lama mata aku tesangkut ba lambar 18-20. Bisi ati aku deka ngirupka serebana ati diri ba rawang tu. Ila meh. Enti enda diatu, sapa orang nemu peragam ati aku? Ati aku rugang, nadai penguang. Pikir aku selalu tepagang ba ruang ke nadai utai. Kelalu suah pikir aku datai baru nuju sebuah makmal sains.

        Udah kelas tambah Pengajar Leo pukul 4.00 lemai nya aku enggau Jennifer endang udah dipaduka kami sekelas nuchi sereta ngemas makmal nya ninting hari Tiga.

        “Indai nuan ke datai tadi neh Julia?”

        “Iya meh nya. Nama, deh?”

        “Ooo… patut meh nuan bajik murihka indai nuan…!” saut Pengajar Leo. Aku malik enda lama ngagai mua iya. Tang iya enda malik ngagai aku. Iya majak nulis sambil merening sekejap-sekejap ngagai botol-botol kacha ti diisi mayuh Macham bansa kimia.

Apuuu..! kesal amat ati aku. Asaika dipandam dada.

        Tungkul ati aku kekebak penuh pengarap. Enda berasai aku bejaku kediri dalam ati. Kain basah ti agi aku gengam enda ngetu kekebas ba atas mija.

        “Peeecccccssssshhhh!

        Betemera kerimpak kacha gelas ba geladak semin. Tekenyit amat aku. Sempat ga aku malik ngagai Jennifer. Iya mega tekenyit tekala nya. Sekepin cheremin jendila ti benung dilap iya nyau deka techabut.

        “Ooo…! Mati… mati … ti…!” Jennifer nyebut utai sengapa. Latah. Kerusi alai iya bediri tadi beguyat-guyat. Nayu deka tumbang asai nya tadi. Kini ke mata aku enda meda gelas nya tadi?dua iti gelas kacha di atas mija tadi lesap sekejap mata.

        “Min … mim … ta ampun pengajar. A… a… aku enda sengaja. Enda meda…”

        “nya meh anang nyual mata! Nuan buta? Neh? Sapa deka nganti nya?!” besai munyi nyawa Pengajar Leo nganu aku. Apuuu! Baru sekali tu aku ninga jaku jai iya pansut ari mulut iya. Gesak asai dada aku. Nadai nyangka iya kempang mansut ke jaku ngenyai nya ba mua aku. Pedis amat ati iya, kini? Enda patut. Aku deka nyelam tasik ati iya lebih dalam agi. Enda liat asai ati aku nganti luching memunyi pukul 7 malam nya.