Pemujur Lumba enggau Main

Selamat pagi, meri tabi basa ngagai kepala pengajar, bala pengajar enggau raban nembiak ti bisi datai begempuru ba ditu.

Aku bisi berasai gaga ati laban diberi peluang bekunsi penemu enggau bala kita senentang pemujur lumba enggau main.

Pemujur dalam lumba enggau main ukai semina bepanggai ba pengering tulang aja. Penemu ba sains enggau teknologi ulih mantu pelumba enggau pemain ngena pengering ti optimum ngambika mujur dalam lumba enggau main.

Bala nembiak semua, teknik belatih ngena chara saintifik enggau sistematik ulih mantu nyungkakka prestasi. Anda lumba enggau main ulih ngena konsep sain enggau teknologi mansik chara-chara ngemansangka lalu ngena asilnya ngambika mujur. Chunto iya, teknologi komputer ulih dikena nentuka bakani chara belanda enggau betul.

Kelimpah ari nya, penemu biomekanik ti mansik sistem biologi, chara tubuh engkebut ngereja siti-siti aktiviti. Ari nya, iya ulih mantu pelumba enggau pemain bejalaika aktiviti enggau lebih efisyen lalu enda berasai pedis tubuh. Ari ti ngena prinsip-prinsip biomekanik nya, pelumba enggau pemain ulih nyaga pengerai tubuh ngambika tegar belumba enggau bemain.

Bala nembiak sekula, bakanya mega pemanah perengka lumba enggau main ti moden ulih mantu nambahka penyulut. Nengah sains enggau teknologi mega perengka lumba enggau main ulih ditengkebang nitihka umur enggau penempa orang ti ngena iya. Teknologi komputer dikena ngasilka lumba enggau main nitihka ukum fizik enggau matamatik. Nambahka nya, teknologi ICT, video, televisyen ulih dikena meratika teknik-teknik lumba ngambika ulih dipelajar.

Nengah chara makai pemakai ti betul mega ulih mantu nambahka prestasi pelumba enggau pemain. Prestasi fizikal bekait rapat enggau chara makai. Diet pemakai ti setimbang ulih ngasilka pengering lalu ngasuh lubah lelak. Sains pasal pemakai mayuh diguna nentuka zat pemakai baka protein, karbohidrat enggau vitamin ngambika ulih meri asil ti optimum ngagai orang ti enggau bepekit.

Bala mayuh ti dipebasa, sains pasal chara berubat ulih mantu ngasilka pemutus ti manah dalam pekit lumba enggau main. Pemansang dalam bidang berubat mantu nentuka pemedis ti ditapi pelumba enggau pemain lebih sida ti bemain. Ari nya pemedis nya tadi ulih diubat lalu ulih gerai enggau jampat.

Ke penudi, dikena aku ngujungka licha, aku meransang kita ti bisi masuk pekit lumba enggau main ulih ngemansangka prestasi diri empu. Enggau nya mega aku meri terima kasih ngagi semua ke udah ningaka aku meri licha.

Dibali ari Buku Teks Bahasa Iban Pom 1            

Wat Jelapa

“Besai puji ke Petara, terima kasih ke seduai apai, indai,” enda alah tatka agi, enggai nyadi ditagang, enda alah tekat. Wat Jelapa engkayuk Sawai enggau Jimbun. Objek belai bechura Kristal, pansut, rarat niti kuyu, nerutu dagu labuh ninggang bau.

            “Wat, pengidup, bekebun, bumai, betupi, beburungka hari, bepangai ba nasit. Ukai ulih nyamin pengelantang dudi hari, enda bebah-bah tau labuh ngenyit,” ku Jimbun apai Wat majak ngansah mata cangkul dikena marit kebun. Tembu ansah lalu dikilir.

            “Nadai lebih ari penemu enggai pemandai ulih nyungkakka pengidup kitai deh Wat. Belajar anang mekang-mekang tembuka ngagai pemadu tinggi, baka tekura enggai enda tepantup ba bandir,” ku Sawai ngelakika jaku laki iya ke sama bela ditujuka ngagai Wat Jelapa.

            “Wat Jelapa enda memunyi, nadai nimbal, iya berunding ngagai penemu apai enggau indai. Tang dalam ati iya nyimpan siti dendam, ransi enggau pengeringat. Ukai dendam ngagai apai ukai ransi enggau pengeringat ngagai indai. Ukai tekala nya tang dudi hari, jemah ila, iya deka bebalaska pemerinsa pengidup enggau pemedis selangkuh tubuh apai enggau indai ti betunggang lupung nyegulaka iya.

            “Nurun ensuruk ambun, pulai ngelaban malam. Mansal diri bekebun, nangkal getah enggau ngibun jelu tupi. Ngulihka asil kena nyanding belanja Wat Jelapa ke benung belajar. Jarang bendar ngetu semadi meh kelalu kirat enggau enda lantang, nya baru bisi belepa.

            “Wat Jelapa anak Jimbun,” ku munyi kangau.

Tu gintir Wat Jelapa ke niki panggau. Bejalai laju mimit tang enda ga ngenyampat pelanda ukui. Pala dikenduk, engkadah ketawa tuchum. Dua piak tapa jari disurung diterima rumbang endur nepu segulung tanda pengamat bulih degree. Ketuchum sepemanjai nurun tangga panggau.

            Dendam di dalam ransi enggau pengeringat ke lama betansang dalam ati, udah dibalas. Enda berasai ai mata Jimbun seduai Sawai labuh nitik nyaya. Nyabak ukai pedis tang kelalu gaga. Anak seduai iya, Wat Jelapa udah mujur bulih degree ba tikas lati, dalam Bidang Sains Teknologi Pemakai. Baka chabi padi, taja tak rumpas gamal, Wat Jelapa nya mensia ke puh, tan, liat ati enggau bagas dalam pengawa belajar.

            Dunya, pendiau enggau pengidup Jimbun seduai Jawai senawah, terang bebendang, berupai, tampak pegari. 

Dibali ari Buku Teks Bahasa Iban Pom 2

Mela Pemakai

Jaku Penerang Bekait Enggau Mela Pemakai Asal Enggau Pemakai Moden

Selamat pagi semua. Aku deka ngelansa pengawa ngasam ikan ari chara asal enggau chara ngena teknologi moden awakka pemakai nya tan lalu ulih diguna dalam timpuh ke panjai. Proses keterubah ngasam ikan iya nya mela. Ikan ke menyana dipilih, ditisik, diperuti lalu diperesi. Udah nya isi ikan mesti dituska dikena muai ai. Nangkanka nya, ikan dipudu sereta digerami ngena garam umbas iya pemasin. Ba orang ke bepeneleba sekilo ikan digerami ngena tiga sudu garam. Udah nya ngulai ikan ngena segempung daun kepayang ti udah dipiris awakka kasam ikan tan. Kanuk getah tau mega kena ngulai awakka iya masam. Gulai mega enggau tiga sudu beras ke udah ditutuk awakka muai bau lang lalu dikempuk sampai rata. Nya baru datai ba proses ngasam. Dalam proses tu ikan enggau gulai iya tadi ditepu dalam kebuk lalu disengkabung enggau selambar daun kepayang tuai. Tanchang rat ngena tali ngambika enda ulih ditama angin. Pengelama kasam nya tau diguna udah enam hari.

            Diatu aku deka ngelansa pengawa ngetin ikan. Keterubah mela, ikan ke menyana dipilih, ditisik, lalu diperesi. Nangkanka nya, proses manduk. Keterubah, ikan dipanduk kediri. Kedua, ikan nya tadi deka dipanduk begulai enggau minyak sayur, garam, gula, sos enggau perengka ke bukai dalam periuk tekap bekesuh pengagat 115 degree selsius ngagai 121 degree selsius. Taja pia, bisi mega ikan dipanduk sereta enggau gulai iya sekali, bepangai ba bansa ikan. Udah nya nepu ikan gulai ke dalam tin. Tin ke dikena mesti vakium, iya nya nadai ngundan gas. Nangkanka nya, datai ba proses steril. Pemakai dalam tin nya deka disteril ngena kesuh pengagat 115 degree selsius ngagai 121 degree selsium. Datai ba proses kepenudi, pemakai dalam tin deka disil, ngambika enda tama gas.

Jaku Tapis

Ke sekali tu aku deka nguingka perening nimpai kitai ngagai pandang pemansang dunya, Kitai majak ngasai penemu enggau infomasyen, ngansak, ngumbak, ngerak sekejap mata, Teknologi ngerekai, baka api nyerarai, enda alah tiap, enda ulih ditesa, kelalu mayuh bansa, Teknologi perang, sekula, singka miga, pengangkut enggau ke bukai chukup macham gaya, Teknologi nya sigi dipenyadi dikena nyanding nembahka penyamai pengidup anak mensia,

 Agi mega aku deka nguingka selinting perening ngagai teknologi pengaga pemakai,

Pemakai enggai diempa, tabakka gulai champur kimia kereban pengasai, tau nyadi nyamai,

Gunung Gading

Taman Negara Gunung Gading nya kampung ujan tropika ke bebukit muak ke barat daya Sarawak. Kampung galau tu, udah dibuka ngagai mensia mayuh dalam taun 1994.

Taman Negara Gunung Gading endang sigi dikemata sida ari Opis Kampung enggau Jelu Siga. Semua orang ke ngelawa endur nya ti deka meda bungai Rafflesia enda tau menyati utai tumbuh ke bisi dia. Bisi ngembuan geretak papan digaga alai mensia mayuh meda bungai Rafflesia ngerembai. Mensia mayuh enda tau ngindik tanah endur bungai tu ngerembai laban bungai tu sensitif. Enti deka meda bungai tu ngerembai, mensia mayuh patut betanya ngagai pemesai ti nguasa palan tu ngambika sida enda lebu. Kebuah pia, laban bugai tu enda ngerembai sepemanjai taun.

Kelimpah ari nya,bisi mega jalai mit ti nuju sungai ke bisi wung deras ari tempat ke bebukit ba Taman Negara Gading tu. Tempat tu mega tau endur memarin. Sida ke rinduka pengawa enchabar, tau niki bukit datai ba tuchung Gunung gading ke tinggi 960 meter peninggi. Pengawa mansik utai tumbuh mega, tau dikereja ba endur tu. Kampung galau tu ulih dilawa nengah jalai darat ari Kuching ke Lundu.

Guan Angin

Gua angina siti agi gua asal muak ke barat daya pasar Bau dalam bagi menua Kuching ke besenapak enggau Sungai Sarawak. Gua tu ulih dilawa ngena jalai darat, iya nya kira-kira 45 minit ngena kerita ari Kuching. Enti ba pasar Bau, pejalai ngena kerita lebih kurang 10 minit.

            Gua angin tu suba kala diuan mensia laban ke bisi puncha ai lalu likun endur diau. Diatu gua tu likun diuan beribu-ribu iku kesindap enggau burung lelayang. Nambahka nya mega, mayuh macham spsis flora ke tumbuh enggau fauna idup ba kandang nya. Berindik ari nya, palan tu udah digazet nyadi palan galau asal.

            Nitihka chara lama, Gua Angin bulih nama ketegal gua tu ditengah angin ti kesut-kesut tama ke dalam gua nengah siti penama ngagai siti penama ke bukai. Ba gua tu, kitai ulih meda tukuh stalagmit, stalatit enggau formasyen batu kapu ke bisi ba Gua Angin ke dipelabaka nyadi kenyau ari 60 juta taun ke udah. Sekeda ari tukuh batu kapu, bisi baka pala enggau rangkah baya. Kelimpah ari meda penyelai ari tukuh batu kapu sereta ngasaika pejalai nengah gua, temuai mega tau mandi ba Sungai Sarawak ke semak enggau gua tu. Ai sungai deras tang pabu, nya alai likun endur mandi. Semak pintu penama Gua Angin tu mega bisi langkau ke dikumbai Baruk endur belelak sereta endur bejualka pemakai enggau ai irup.

Nangga Bukit Merbau

Tabi semua,

Terima kasih laban udah meri aku peluang nyeritaka peneleba pejalai kami ngagai bukit merbau. Kena 20 June, beserimbai enggau Hari Sayauka Rampa Menua, raban kelab kami bisi udah ngatur aktiviti nangga Bukit Merbau. Sebedau aku neruska jaku tu, aku deka nanya sapa bagi raban kelab ke bukai ti udah kin?

            Apu, umbas iya ga peninggi bukit nya! Kami bekejang nuju bukit nya tumu laban berumban hari ti agi chelap. Kami bejalai enda berumban nengah ratan jalai orang ti begigaka buah isu. Taja jalai mar dititi kami tetap liat ati ngenatika diri ba tatai tuchung bukit. Munyi ku jaku sempama baka tekura enggai enda tepantup ba bandir.

            Hari pagi nya seninjik amat baka ke nyangkung pejalai kami. Kami belubah nengah tanah paya lalu neresap madang maram. Bala sida ke indu sempat ngambi seleka dua laban nangika diachuk duri. Dadai ba tinting siti kami semua sengian laban meda anak kera benung berebut bepakaika buah. Umbang buah nya bedampar labuh ba tanah. Kenu ku Pengajar Elizabeth Duya nama buah nya buah kubal.

            Urung pukul 12:00 tengah hari kami pan nuntung ba tatai punjung Bukit Merbau. Kami berengkah ngidupka api laban deka bebelaka pemakai. Semua atur pengawa sigi udah dibagi ari pun tang ukai semuna nyebut aja. Kami enggai baka kepayang ngadaka dilah, nemu bejaku aja tang pangku pengawa enda digaga. Kami ngereja pengawa nadai penanggul laban sama bela betulung. Munyi ku jaku sempama, lempung sama nanggung, berat sama ngangkat.             Kami rindang amat ati lalu asai enggai pulai ari punjung bukit nya. Naka meh pengerindu bayam pemadas rampa menua ti dikumbai punjung bukit. Maya ekspedisyen nya, mayuh macham penemu diulih bala kami. Kami chukup andal ati laban ukai semina ngujika pengenan tulang sereta liat ati tang ulih ngelala mayuh macham buah kampung baka buah kundung, buah payun, buah senggang, buah ridan, buah pedalai, buah nyekak, buah sibau dara enggau mayuh agi. Kelimpah ari nya, kami rindu meda dandang kebun sawit orang rumah panjai. Pia mega, lada ti bebuah lebat ditanam ba tanah ami ngaki bukit merbau. Maya tu baru kami ulih ngasaika temegah ati ngembuan menua ti betuah.

            Kepenudi, kami meri besai terima kasih ngagai pengajar Elizaberth Duya laban ulih madahka kami mayuh macham nama bansa kayu sereta buah kampung ti ulih diempa tauka dikomersial jemah ila. Naka tu aja utai ti ulih dikunsika aku enggau bala kita semua. Aku arapka kitai ulih bekunsi nyeridi pengerindu ngagai menua kitai ti kaya enggau pemakai sereta penatai pemisi.

Sampi

Dinga nyawa nuan tak kela – kela madahka diri idup, ada ke dunya nyerumba didihari. Dipandika indai nuan ke ai, diiring enggau pangkung tawak segala. Sungga ke ili anak diri, sungga ke ulu anak aku. Peda nuan tak berupai gaga ketawa tuchum rang. Gerai meh anak sejalai kenu ku indai ti balat sinu nadai kala jai jaku. Datai ba kaki tangga peda tak gemisai keberai ujan nyala ngayuka nuan anak bias  ari tubai ulih ngali, tajam nyemilu tisi. Datai di ruai lalu diunsaika ini nuan rendai ngambika nuan regas, tegar bejalai enda mudah kirat begulai enggau orang. Nya meh nuan digagaka apai nuan nama, ensumbar Bujang Linggang Nengeri, Nading Berani, Lantang di Lempung Luak Ati. Nuan ga lalu ditata enggau minyak nyiur nyintung, ngambika nuan ila pegari baka matahari manchar terang. Pedamulut nuan tak nyingkum tuchum senang ati. Dia nuan lalu mejamka mata tisi ngantuk tinduk bemimpi.

Ripih Meri Anak Mit Mandi

 

Maya anak mit dianjung orang mandi, kira pengudah tanggal tampuk pusat. Enti anak nya apin diberi mandi ke ai ngena piring iya apin tau dibai mandi ke ai ngapa. Tuju iya ngambika sida enda mudah  tesat melalat maya mindah begunaka sungai laban bisi Bunsu Ai, Bunsu Ikan nulung mandung sida. Sehari sebedau pengawa deka meri anak mit mandi, sida serumah ditesau asuh diau magang awakka sama enggau besaup ngereja pengawa ungkup diri pegila.

            Tumu pagi maya pengawa nyadi, dia orang endang udah besedia magang deka nurun ke ai. Ngenuluka bala, orang ti mai menira lalu ditangkanka lelali siku ti minching manuk ke nangkin ilang. Nangkan seduai iya indu siku ti mai piring ke endang indu pugu kalu sida serumah laban iya dipadu nyunggaka anak mit nya. Nya bari ditangkan indai enggau anak mit ke disandik iya enggau pua kumbu.

Enti nyema indai anak mit nya apin regas, indu pandai sida serumah ga nyandik iya. Baru ditangkan sida ti betebah enggau semua bala mayuh ti sama nurun ke tepian ai magang. Tuju sida ke betebah richah rami tu awakka kena mampul pending lalu enda ningga munyi burung changka maya nengah jalai sepemanjai pengawa meri anak mit mandi.

Datai di pendai, lelaki ti nyan tambai lalu mantap ai lalu iya ti megai manuk tadi besampi ngagai Petara Ai minta tulung minta sukung awakka anak mit nya bias lalu nadai menawa dudi hari ila.

Tembu besampi iya lalu nyiuhka rangki leka marik enggau piring nyadika tisih ai kena anak mit nya mandi. Nya baru anak mit nya disungga begadai. Sungga ke ulu, sungga ke ili, sungga ke mua enggau ke belakang tiga kali. Indu nya pan nyampika anak nya jampat besai lalu bepengerai, bias, pandai, kaya, raja, bidik lansik nguan menua.

Sebedau mulaika diri, sangkuh dientak tunsang lalu ditanchangka anak manuk dituat ke atas enti anak mit nya lelaki. Enti anak nya indu ditanchangka orang bungkus abus tauka leletan ba lidi dituatka ba atas mega. Tembu nya, orang pan pulai nunda tangkan sida nurun tadi. Maya sida nyungkah di pala tangga sida dilaluka orang niki.

Datai di ruai, anak mit nya dipangku indai iya lalu duduk di atas selebuan tawak. Seduai menyanak diserayung orang enggau pua kumbu. Tu meh orang ke tuai bulu nata anak mit nya ngena ai ubat. Tuju iya ngambika anak mitt u udah besai ila enda ke paku ke tubu orang tang nyadi mensia ke menyana. Pengerami makai selamat pan berengkah dikenan mantaika pengaga ati ari nulung enggau besaup sida serumah maya pengawa meri anak mit mandi.

Nganyam Tikai

 

Pengawa nganyam tikai tu siti ari pengawa ke suah digaga indu kitai bansa kelebih agi bala indu ke diau di rumah panjai. Sekeda bansa utai tumbuh ke tau dianyam iya nya baka rutan, bemban, buluh, senggang enggau kerupuk. Ketegal ari ubah pemansang, dia pengawa ngayam ari utai tumbuh asal nya enda tentu dikemeranka agi tang bala indu rindu agi nganyam ngena bila plastik. Ari nya pengawa nganyam utai tumbuh patut diperansang ngambika enda lenyau pia aja, ambika chunto baka nganyam tikai bemban.

            Pengawa ngayam tikai bemban tu berengkah ari pengawa mantap bemban. Maya ke manah mantap bemban iya nya maya musim panas. Kebuah pia, laban bila bemban ulih dijembui ngambika enda buruk lalu tan lama. Bemban ke dianyam iya nya bemban batu tauka bemban ai. Bemban ke dipilih iya nya bemban ke udah chukup tuai tauka iya ke udah bepanga dan. Bemban ke udah dipantap lalu disemela awakka sama panjai.

            Udah nya, bemban lalu tau disimu. Nyimu tu pengawa ngulihka bemban isi bemban ari lampung. Lungga siti ari kereban ke suah dikena nyimu bemban. Udah tembu pengawa nyimu, dia bemban tau dibai pulai ke rumah lalu tau dijembui datai ke rangkai dalam pengelama dua tauka tiga hari.

            Nangkanka nya, udah bila rangkai bemban tau dilit. Sebedau ngelit, bila tau dilaja dikena ngelai endur kitai ngulihka isi bemban enggau empulu. Empulu tauka empeda deka dilit baru laban deka dianyamka pelampan. Isi tauka lambar bemban dikena ngaga tikai bebuah tauka tikai sana. Tikai bebuah ngena lambar ke alus lalu tikai sana ngena lambar bemban ke besai agi.

            Bansa tikai anyam diri baka anyam tunggal, anyam dua, anyam tiga, anyam diri, anyam belida enggau iku enseluai. Bansa anyam tikai bebuah ngembuan motif kediri empu bepanggai ba pengelandik siku-siku. Sekeda ari motif tikai bebuah ke digaga iya nya buah rambing, akar engkelait, burung ruai enggau dulang sempandai. Selalu iya tikai bebuah tu dianchau maya pengawa ritual baka begawai tauka miring. Enti ngintu pemati, tikai tu diambika selap tauka “perau” sida ke parai. Motif tikai tu endang bepun ari sida ke baratika utai tumbuh tauka jelu ke bisi bekelinggi enggau sida iya. Sida ke landik endang meruan nemu nengkebang kediri motif ti deka dianyam. Pia meda sida ulih bechuntoka motif ti digaga urang bukai.

            Udah bulih motif tauka bansa utai ti deka dianyam, dia bala sida ti deka nganyam lalu belabuh nganyam. Ngambika lambar bemban nyamai dianyam, dia lambar deka disemunka dulu. Buah tikai manah dipeda enti anyam nya dedat pisit. Sulat dikena misit tikai. Tembu nganyam, tisi tikai mesti disilup, udah disilup rambu tikai mesti diketas ngena lungga.

            Pengawa nganyam tikai ngena bemban tauka utai tumbuh asal tau lenyau enti enda ditanka. Nya kebuah nembiak ke maya hari tu patut bisi pengerindu deka belajar nganyam. Pengawa tu tau bendar nyadi siti ari penatai pemisi ti ulih mantu ekonomi diri sebilik sereta ngenanka identiti bansa kitai ke endang bisi motif kediri ke bebida enggau motif anyam bansa bukai.

Temilah Bungai Nuing

Bungai Nuing neresa ambun ngejang rumah. Iya pan lalu bejalai laju baka peluru leka bangkang, pejalai deras baka upas kesulai tandang. Bukit ditiki sungai diili. Umbas ga penyaun. Taja pan berasai ikak enda meh iya ngetu laban keran deka napatka buah kara benung mansau nyerenang. Agi besebun ambun iya pan udah datai.

“Em… tu baru iya. Enda baka suba endang nadai utai ke ulih laban buah udah lalu,” kenu ku Bungai Nuing mut – mut kediri. Iya enda checamang agi terus nyumpit – senyumpit. Bunyi burung richah amat laban gaga bepakaika buah kara. Tupai engkerabak nyau bekekejuk merejuk sebelah dan kayu. Perut engkeriuk enda meh iya peduli laban rindang nyumpit. Panchar mata panas udah nampun ba ujung pala. Maya tu, munyi richah burung nyau kurang laban udah terebai ke bukai ketegal kenyang. Nyau begilik hari, iya lalu pulai laban udah bulih burung.

 “Ai wai, duduk meremi meh kitai anang kakang. Duduk lantang ba batang kayu melintang. Sama munsi meh kitai tub utu wai. Tesap jampat dikin ansah batu chanai. Kirah manah ba ai ningkil miang. Panduk manah enda pang,” pia ku jaku siku indu maya sida munyi tubu lebuh sabung lemai. Kira nyau salah kelala iya pan datai ba ili pendai sida. Nyepi diri ti kelalu angat iya lalu beguai nyepuhka tubuh sambil betipuk – tipuk masahka kandang belakang.

Udah mandi, nyau gatal gisai – gisai tubuh tudah tuai baka ke dibalut rengas. Udah nya iya mupuk lalu ninga nyawa orang bekedumu. Disubuk iya, peda bala indu benung munsi tubu ba ulu pendai nya. Meda baka nya, iya tepadam sedu laban udah mandi ai tubu bala sida indu. Tubuh ti gatal tadi nyau majak agi. Iya lalu ringat penapat, kudi ngerandi lalu ngelepaska burung ti agi idup bekau kena sumpit ari kerungan. Nama agi deh gaga meh bala burung nyau kebap – kebap terebai. Ukai semina nya aja, temilah ti puang nadai laja pan ditempalingka iya.

Terebai jauh meh temilah nya tadi mansa paya rebuh. Terebai manah meh temilah  nya ngelangkah perabung rumah. Lalu meh temilah nya ba daluh munggu betingkah. Hari siti kenu ku cherita, temilah ti ditikai iya tumbuh nyadi seperungan bulih ti enda bemiang. Sepengudah nya orang be menua nya naka pengandal – ngandal ati bisi ngembuan buluh nya. Datai ke diatu orang ba menua nya naka pengaga – ngaga ngembuan buluh ti nadai miang. Nitihka jerita buluh tu agi meruan bisi ba menua Kampung Tepin, Serian. Pemanah buluh tu nadai miang. Lauk ti dipansuh buluh tu nadai miang. Lauk ti dipansu ngena buluh bebau rengut sereta meri pengerai.

Orang kelia Bumbus

Ba munggu empelam bisi rumah panjai siti. Rumah tu angat ketegal mayuh orang mati nadai nadai tentu bisi kebuah. Ketegal nya sida lalu kasak - kasak ngiga endur dikena ngaga rumah panjai baru. Sida serumah pan lalu berumban – rumban ngaga dampa alai sida iya diau. Nyau kelama idup bedampa, bisi sekeda nyau suntuk beras. Ketegal nya, bisi seduai melaki bini deka bemalam ba rumah panjai ti puang nya laban deka nyembi padi.  Bisi sekeda tu takut nyau bebai - bai deka nyembi padi tang lalu enda berani. Seduai melaki bini lalu mupuk bejalai begadai – gadai napat endur rumah panjai ti ditinggal nya. Datai di rumah panjai nya seduai lalu begadai – gadai nyembi padi. Ngumba ga hari maya nya enggai enda ujan lalu seduai enda pulai. Enti nitihka perambu seduai sigi enggai bemalam – malam ba rumah ti puang nadai mensia. Maya ti bemalam seduai semina tinduk – tinduk manuk laban mayuh penangi. Kira ke baru deka Bengal pending seduai bisi ninga kaki ti besetap – setap munyi orang datai ari ujung setak. Seduai sigi enda takut seleka mukut lalu napat endur munyi nya. Laki indu nya lalu enda chamang – chamang ngentum gamal utai ti nyau guntam – guntam ngena sangkuh. Lebuh dani pagi siti seduai tetemuka bangkai enturun gegaring ba jalai pendai. Ketungkah nya, orang di Munggu Empelam nadai apa nadai nama agi. Idup gerami nyamai sereta beranak – betelesak.

Beh enggau Banteh

Kenu ku cherita, udah betaun – taun ngani menua tubuh majak mayuh. Nembiak redak pan betambah. Tanah nyau kusi. Umai tempalai nyau deka pedis digiga. Nya kebuah bisi sekali bala nembiak bisi tekelanjur besengki jaku enggau pangan diri. Ketungkah nya, Beh enggau Banteh pan beruding deka ngiga endur baru.

            Beh enggau Banteh tu orang ti teleba sereta landik bejalai sebelah babas. Landik bechuanka pengelabuh matahari sereta bemalinka batang sungai lebuh maya ngasu beburu. Nya meh kebuah enda kala tesat. Sema jaku, bebekalka garam seleka idup meh seduai laban seduai tu ngembuan penemu daya idup ti tinggi.

            Kira sepiak bulan seduai lalu sangkai ba tisi sungai. Sepiak sungai bisi pun kayu pundang rurus amat bediri baka ke nemu nyapa sereta minta bai bejalai. Kepuas gegining seduai lalu nibak kayu nya. Tibak kayu nya dipansap manah diraut nunda tukuh perau. Kebuah bakanya ngambika mudah iya anyut ngili sungai. Seduai pan lalu besampi ngarapka ulih tetemuka lungga emas ti ditanchang ba tibak kayu nya.

            Sepengudah pengawa nya, Beh enggau Banteh nikal pulai ke Tembawai Munggang baru. Datai di rumah panjai meda bala pungka lelaki ti bukai baka Engkabi enggau Kekai udah mega sama bejalai baka  seduai. Ari nya tadi seduai pan bejalai baru nitih raban sida iya. Sekali tu seduai nguji bejalai ngena sungai iya nya ngili Sungai Batang Krang iya ke diatu. Kira beberapa hari ba rantau ai seduai pan sangkai ba nanga Sungai Remun iya ke diatu. Maya mudik sungai nya seduai lalu tepedaka tibak kayu pundang ti meruan lungga tesangkut ba tisi pun bemban tumbuh nebing sungai. Naka meh pengaga ati diri. Maya nya mega, ngumba endar ga tibak kayu pundang nya, nyau kekidu diteruju ai baka ke andal ati nyambut penataai seduai. Semina seduai aja meh nemu sagam ati seduai iya maya nya. Seduai pan lalu terus mudik ke ulu napat endur seduai ti nibak kayu pundang bedau lama.

            Perau mit ti dikayuh seduai umbas sereta rumpas dikena seduai iya enselit entigis sungai ti repa. Lebuh udah ikak bekayuh, belelak ga seduai seraya ke nginti ikan. Pemakai sigi meruan laban babas sigi mentas nyediaka kantuk lengan. Maya hari nyau salah kelala, ngerapas ga seduai begagagka langkau arau.

            Tumu pagi siti lebuh seduai iya belelak, dia seduai ningga munyi burung ti bebunyi “re… re… mun… re… re… mun”. bepun ari nya, menua tu lalu disebut menua Remun nyentuk ke diatu.

Dibali ari: Eli Luntai, 2017 enggau ari Buku Teks Bahasa Iban Pom 2

Asal Nama Bukit Tiku Lengan

Nya kenu, ensera tu nyadi maya menua kitai agi pabu jelu enggau antu kelia. Bisi tiga iku Memaloh bedunju ba emperan Nanga Sungai Serugin enda jauh ari Nanga Ranan ti bepati ari Sungai Kanowit. Sida ngambi wi serayaka ngubat lusung enggau kurap. Tiap lemai sida mudu tubuh diri ngena daun rugin ti endang dikena orang kelia ngubat penyakit kulit. Kulit sida tiga pan nadai bekeribau lusung enggau kurap agi.

     “Enti baka tu, badu orang kejika kitai ila unggal. Nyau puas kitai malu dikangauka orang Lusung, Kurap enggau Kumung nih unggal,” ku Kumung ngenang ngagai Lusung seduai Kurap.

     “Au, pengering, pemagas, pemerani baka orang nya ga kitai diatu,” ku Kurap. Lusung semina tuchum lelegup aja ningga seduai muji diri. Pemuas sida tiga ke berandau, lelap ga mata. Enda berasai hari teringkas tawas. Tumu pagi nya, Lusung madahka diri deka matau menua sebelah bukit nya nyangka bisi tetemuka jelu enggau burung. Nadai ga iya tetemuka burung enggau jelu semina bisi ningga utai begemung munyi ribut kudi. Titihka iya munyi gemung nya. Engkadah ke puchuk tapang, peda iya pemayuh labit manyi baka ke disanggit.

     “Kada enda tu, kenu ku orang Tapang Ngua ke diinggap manyi naka pemayuh-mayuh enda dijena-jena.” Pia ku iya bejaku kediri.

      Ba tuchung Bukit Tiku Lengan, iya rindang amat bayam pemanah rampa menua. Tembu ati, iya pulai ke baruh. Datai di baruh lalu nusui pemayuh labit manyi ngagai Kumung seduai Kurap.

      Pagi siti, tumu sida tiga mupuk nuju pun tapang. Lusung seduai Kumung niki pun mujau. Datai seduai di dan legit seduai pan lalu nyempalangka tali tekang ngagai dan tapang. Dientun lalu dikedut seduai iya puchuk mujau nyendi dan tapang keterubah. Tembu nya, seduai nurun ke tanah laban takutka indu manyi begau.

      Enti nitihka adat muar manyi, tapang dulu ditimang orang kena minta pemendar ari Bunsu Remia ke nyaga manyi tapang tang sida tiga kelalu gagit deka ngulihka madu manyi. Sida ngasaika diri tegar tulang sereta landik niki lalu enda ingatka adat mensia mayuh.

      Hari pan nyau lemai, bala indu manyi di puchuk tapang serekun pulai ke sarang. Lusung madahka seduai iya Kumung niki tang Kurap di baruh ngidupka tugung panduk lalu nyambut ritung.

      Mujur amat sida tiga muar manyi. Indu manyi nyau bekeberai muai diri ngagai tungung panduk. Seduai di puchuk tapang nya nyau nyubak-senyubak idang madu manyi ngena belidau. Penuh ritung lalu ulur seduai iya ga. Enda lama udah nya, dia seduai bisi ningga gemung ribut ke bepuput belubah muputka puchuk tapang. Diwaka ribut belubah-lubah asaika ulih japai tanah. Udah nya, diwaka ribut baru ga, asaika ensuruk remang ga peninggi. Rindang asai ati seduai di puchuk tapang.

      Enda berasai seduai merejuk ke tanah gaga ensepi diri asaika terengkah di tanah diwaka ribut. Nyau talang-talang seduai ke terejun terempas ninggang bandir tapang. Lesi bebadi mih Lusung seduai Kumung maya midang ketegal ari asa nekang tapang. Lela mega seduai diwaka Tapang Ngua tinggi gelai-gelai, danjan kenu seduai ditaban malam di tinting Bukit Tiku Lengan enda tepadahka nyawa padam sinu ngenang. Ketegal dua iku Memaloh ke parai niki tapang ngulihka madu manyi, Bukit Tiku Lengan bebali nama nyadi bukit Memaloh datai ke sehari tu.

 Dibali ari Buku Teks Bahasa Iban Pom 2

Juluk ati

Ari ke ngembuan juluk ati, nembiak tentu bisi inisiatif enggau motivasyen dikena nyapai juluk ati. Nya alai semua nembiak mesti bisi ngembuan juluk ati. Ketebal agi juluk ati ke dikembuan bala nembiak endang befokus ngagai profesyen ke diinginka sida enti udah badu sekula jemah ila. Injinir, lutur, luyar, pengajar, polis enggau ke bukai agi nyadi bengkah juluk ati ke dipilih. Pia mega Jelawai, ngebuan juluk ati ke deka nyadi lutur jelu jemah ila. Jelawai nemu ukai mudah iya deka nyapai juluk ati iya. Nya kebuah iya seruran betatika sekeda chara dikena iya nyapai juluk ati nya.

            Keterubah, iya patut belajar bebendar. Jelawai nemu pekara pelajar nyadi elemen ke pemadu beguana dikena iya nyapai juluk ati iya. Nya kebuah iya patut bebendar ninga lalu nitihka penerang ke diulih ari pengajar ke ngajar ba dalam kelas. Kelimpah nya mega iya patut ngena maya lepa sechara optimum belajar kediri enggau belajar beraban endur ngagaa ulang kenang sereta pejuraika penanggul dalam pengawa belajar.

Dibali ari Buku Teks Bahasa Iban Pom 2

Ari Aku ke Nuan

Jalai raya di kandang menua nya enda tentu manah. Iya ke bendar, jalai raya benung diadu. Pengajar Dayang merening ke luar. Ari kiba ngau kanan jalai, agi myuh bendar temuda puang apin alai muka pengawa. Rampa menua ke baka nya bisi meri gambar pasal chara pengidup orang di menua nya. Sekali dua, bisi mega dipeda sekeda kebun lada ti dikelingi babas ke repa. Bisi mega tanah emperan enggau paya dipumai lalu padi nyau gadung tumbuh bauh. Jauh mua ke tengah – tengah menua, tatai bukit kelingkang ke nyadi entara Sarawak enggau Kalimantan dipeda regah – regah. Tiang besi ke narit tali kabel elektrik ari Tekat Hidro Batang Ai, bediri dedegi baka robot besai di tengah – tengah kampung. 

            Pejalai sida udah datai ba dandang menua alai orang nanam kelapa sawit ti semak rumah sida Lamai. Sida pan nyau semak deka datai ba rumah sida Lamai. Apin sida niki ke rumah, Jong nanya sekalika rumah nya tau ditiki tauka enda. Jong nemu pasal bansa orang dia. Iya nanya enggau jaku ke terang bendar. Jong endang lanchar endar bejaku Iban. Pengajar Dayang berasai benasit bendar bemalinka nembiak baka Jong ken emu jaku mayuh bansa. Lama tak nadai saut ari dalam rumah.

            “Oh kitai bisi temuai. Lalu, lalu! ku orang ari rumah.

            Jong berasai ati meda rumah panjai Lamai tak sunyi. Rumah nya enda baka maya Jong ke kia dulu suba. Tak berasai lain asai sepi iya. “Anang – anang orang ditu ngulit,” ku sangka iya.

            Udah Jong nerangka pejalai, sida lalu diuluka orang ngagai bilik Lamai. Penatai Pengajar Dayang disambut Lamai enggau ati ti sinu. Lamai nadai ngadang sida Pengajar Dayang sereta bapa pangan iya datai ngusung iya kia. Pengajar Dayang, Jong, Said, Maureen enggau Jamilah tekala nya nemu penuah ti nuntung sida lamai sebilik. Sida iya balat tusah ati. Pengajar Dayang, Jamilah enggau Maureen bela labuh ai mata ngenang penusah ti nuntung sida Lamai sebilik.

            “Minta ampun pengajar, aku enda ulih pulai ke sekula. Apai aku udah nadai,” ku Lamai. “Nuan nadai penyalah, Lamai. Sabar Lamai. Bala kami meretika penusah nuan. Nya meh kebuah kami datai ngabas nuan,” ku Pengajar Dayang. Pengajar Dayang balat sinu ati ngenang penusah sida Lamai. Lamai ndai sanggu nyeritaka utai ti nyadi ngagai Pengajar Dayang enggau kaban sekelas iya. Semina enggau mansutka cherita penusah nya, asai ati iya ke merinsa ulih pama agi. Ukai ga nejuka baka bakih enggau pengajar iya ngasaika ati ti luluh ditinggalka apai ti pemadu dikesayauka iya, tang iya arapka bala bakih iya ulih nusui utai ti nyadi ba iya sereta bala pengajar ti bukai. Penusah ti nuntung Lamai asai ked iambi mimpi laban apai iya nadai sakit.

            Pengajar Dayang arap bendar ari chara Lamai bekunsi penusah ti nuntung iya, nya siti ari chara iya ulih ngelimpangka diri ari ti semampai ingatka apai iya. Bala bakih Lamai endang semampai mantu iya, lalu Lamai ulih neruska pelajar iya baka selama.

            Enda alah dikeingatka belama orang ke dikesayau ngejang ninggalka dunya. Ati ti telih, rugi enggau penusah ti nuntung kitai enda ulih dikenang belama. Lamai nyau suman, pengidup mesti diteruska. Berekat peransang sereta sampi bala pangan enggau pengajar, Lamai mujur nampung pelajar iya ngagai univesiti.

 

(Dibali ari: Jantan Umbat, 2009. Madu Rimba. Syarikat Damamaju Eldriana) Sereta Buku Teks Bahasa Iban Pom 2

Jaku Peransang Besekula

Selamat lemai ngagai kita semua nembiak ke diau ba buding taun tu. Ngena peluang tu, meri tabi puji ngagai nembiak pom sat utu baru deka belajar idup ba buding. Aku mega meri tabi puji ngagai raban pengawas ti bebendar ngantur aktiviti sepemanjai minggu orientasyen sekula kitai.

Jaku peransang aku keterubah iya nya anang enda belajar bebendar lalu ngasika jaku pengajar ti ngajar kita. Baka kami tu endang semampai deka mantu sereta ngiring ngembing datai ke kita lati ba sekula.

Peransang aku ti kedua, nuju tuai nembiak taun tu iya nya Stephen. Aku meri tabi puji ngagai nuan sereta ngagai raban nembiak ti bukai laban taun nyin kemari kitai bulih lumur dua ba Pekit Buding Tebilang Tikas Bansa.

Ngena awak tu mega aku deka meri peransang ngagai tuai – tuai nembiak buding ke bukai nyengkaum buding sida ke indu. Aku arapka kitai taunt u ulih mujur. Nadai utai enda ulih dijapai. Sama – sama meh kita sereta nurun ke menalan. Arapka kita sama besaup bekunsika penemu enggau penau lalu anang mai penemu baka engkita tauka engkami. Bala kita ti bisi ngembuan pengelandik menggal mit patut lempung tulang besaup nembuka projek.

  Nya aja, terima kasih.

Memarin ke Tuchung Bukit Agun

Auh kukuk manuk ari rumah panjai sida Jingan nyau nadai didinga agi. Tengelam laban munyi burung ti richah. Bala jelu jangkit didinga inggar nyapa ari puchuk kayu. Sida ngigit, kemayang panas enggau penguin asal kampung ti bukai sama bela betimbal nitihka jaku bansa diri. Babas gadung ke tumbuh galak sereta ditambahka enggau penyelap angin ngeransingka pejalai kami. Pengajar Linggir meri jaku tangkan siru ngasuh bejimat lalu enda ngasuh nyual mata maya bejalai enggai ke teterap tetingkap lalu teulihka pemedis. Jingan laban ke sikar sereta masai ba menua nya, sempat limping ngambi sekeda buah kampung ti benung mansau. Iya nemu sekeda pengan iya enda kala ensepi buah kampung. Bisi mih ke berasai manis enggau masam. Keleju ke bejalai, sida pan datai ba pala kerangan ba Sungai Agun ke alai sida sebuat ngetu belelak sambil bayam rampa menua. Batu kerangan ngampar ngapar senebing-nebing sungai nya.

Sekeda sida kisuk nangkap gambar ngena kamera ngambika bisi ke pengingat. Gunchur ai ari wung muak ari ulu sida ke ngetu narit ati mayuh sida sebuat. Sekeda sida sebuat peluang empungas mua sereta bebasu kaki jari. Ai iya berasai chelap nanchum. Nyadi sida ke enda tan ati meda penyiru enggau penyelap ai bisi lalu neguk ai nya dikena muai aus. Kilas sekeda ikan sungai baka enseluai, kerak periuk, entebalang enggau buing tampak dipeda. Nitihka timpai mata kasar, kandang menua nya endang agi lati. Batang kayu nyau bebesai, puchuk berupai tinggi, dan jurai sereta daun rinda nyelebumbun. Agi mayuh paku tubu. Agi meruan rutan danan. Babas tumbuh galak ti mandangka daun ke rimbun gadung.

Pengajar Linggir ke matak pejalai sekali agi nangkan enda ngasuh sida kelalu rindang bayam pemanah rampa menua laban tagat endur ti deka ditapat alai sida sebuat memarin agi jauh.

Sida nampung pejalai baru lalu belabuh nanjak Bukit Agun. Maya sida baru deka nyanggah bukit nya, dia sida meda Pengajar Linggir seduai Jingan ke matak jalai benung bekenanas deka ngelepaska siku anak pelanduk ke disintak panjuk.

Bala sida bukai lalu datai ngandak deka meda anak empelanduk. Anak empelanduk dilepas lalu kechit-kechit sereta tepawir mai jingka nabanka kaki pedis ti kena sintak amba.

Udah nya, sida lalu nampung baru pejalai sida ke nanjak bukit nya. Maya ke nanjak bukit sida ngasika diri endang berasai bengah dirandang pengelelak enggau pengikak. Maya tengah gari nampun, raban Kelab Rampa Menua SMK Tinting Tebilang likun manggai di tatai Bukit Agun.

Udah sida kemas ngatur alai endur ngenduh, sida sebuat dulu matahka lengan. Kemas pengawa nya, sida lalu napatka gunchur ai wung ti beringkat-ringkat nujuh nachak nitihka pengerenjan bukit nya. Pengajar Linggir dulu meri jaku lalau ngagai nembiak sebedau sida memarin ba ai wung nya. Sida sebuat rindu bebajau dia. Nyelam, nyemerai, enselur, beimbu-imbu enggau mayuh pemerindang ti bukai. Sida ngemuaska ati diri sambil ngambi gambar. Mayuh bansa gambar. Udah puas memarin, urung pukul 3:00 lemai sida lalu mulaika diri nurun Bukit Agun nelusur jalai sida ke mansang, mai pengerindu ati. Sida gagit deka bekunsi peneleba nya enggau bala pangan ke enda bepeluang memarin enggau sida.