Siti ari ngepan ti
dikena sida ke lelaki bansa Iban menya iya nya sirat. Sirat ukai semina dikena
diau besehari-hari, tang mega dikena lebuh nurun ngayau, maya enggau pengerami
gawai enggau pengawa ritualti bukai. Sirat digaga nitihka pemesai selangkuh
tubuh orang ti ngena iya.
Orang ke laki mega bisi
ngena kain chelum nyadika sirat. Enti sida ngena kain chelum nyadika sirat, ba
ujung kain nya dilekatka sida ngena marik, kerubung tekuyung mit enggau
gerunung. Sida ke lelaki suah ngena kain sirat ti bechura chelum lebuh maya
bisi penusah tauka pemati.
Dulu kelia bansa Iban
selalu ngena asil babas dikena ngaga gari baka sirat, kain enggau pua kumbu.
Sirat digaga ari kulit kayu tekalung. Kayu tekalung dititi ngulihka kulit iya.
Sebedau ulih dikena nyadika gari, iya dulu ditenchang alus-alus ngena pemalu
temeran dataika nyau besabut.
Kelimpah ari temeran
kulit kayu tekalung, kain asil tenun mega tau digaga nyadika sirat. Kain tenun
ti bechura pirang selalu agi dikena nyadika sirat. Lebuh orang deka berengkah
nenun kain sirat, sida ngaga chura bungai nitihka guna orang ti deka ngena iya.
Orang ti nenun kain nya mega enda sengapa ngaga chura. Sirat ti dikena orang
ngayau tauka begawai dulu kelia bechura mirah tauka pirang tuai.
Lebuh ti berengkah deka
nenun kain sirat, tukang tenun deka besampi tauka miring dulu. Sekeda ari
kereban ti dikena ngaga kain tenun iya nya pemalu taya ti dikena kapas sebedau
digagaka ubung. Urat engkudu enggau kulit sebangki ulih dikena nagaga chura
enti iya udah diproses. Sepengudah kain nya tembu ditenun baru iya tau dikena
nyadika sirat.
Kemaya hari tu sirat
selalu dikena lebuh bisi ngintu pengerami begawai, nikah, ngelaluka penatai
pemesai enggau pengerami ti bukai. Sida ke lelaki endang dipeda sigat bendar
enti lebuh udah begari ngena sirat enggau kereban ngepan ti bukai. Nya alai
nembiak rebak baru patut bisi runding ngemeranka sereta angkun ngena sirat
lebuh ngintu pengerami.
No comments:
Post a Comment