Temenggong Koh

Koh Anak Jubang ada dalam taun 1870 ba Pulau Ensulit, Batang Kanyau, Kalimantan. Iya siku ari tuai bansa Iban ke chukup jelai nama lalu kala dichirika perintah Sarawak nyadi Temenggong. Ukai semina dalam raban bansa Iban, penampak rita iya mega ditemu genap pupu raban bansa dalam selampur menua Sarawak enggau Kalimantan. Raban bansa Iban ke nguan kandang menua Batang Rajang kelia endang chukup taluk ke iya laban penau iya mutarka sesebengkah pekara tauka isu ke bisi nyadi. Ambika chunto, iya bisi numbuhka atur bekait enggau pengawa berimba enggau bempu tanah tauka temuda. Kelimpah ari nya, miya mega chukup dipebasaka perintah Raja Brooke ketegal pengelandik iya bejalaika sekeda polisi perintah dalam raban bansa Iban.

Lebuh jeman tu, penyerekang kaul antarabangsa diri enggau bansa bukai endang agi bisi nyadi. Penyerut tu ukai semina nyadi dalam perintah Sarawak ke dipegai Raja Brooke tang ngerekai ngeluah sempadan ngagai menua Kalimantan ke dipegai Perintah Belanda. Besenutuk enggau rambau tu mega pengidup iya enda lari ari ngasaika pendiau dalam menua siga laban penyerekang kaul baikka antarabangsa diri tauka enggau bansa bukai.

Temenggong koh tu siku ari anak Iban ke bisi ngembuan peragam runding ke tetap sereta tajam maya nya kelia. Ari perati iya penyiga menua ketegal penyarut antara pupu raban bansa maya nya tau bendar nyadi nenekul pemansang runding enggau pengidup mendia mayuh. Nya kebuah iya lalu bekira ngiga jalai nyerakupka pupu raban bansa ke bisi nguan Ulu Rajang, Batang Baleh, Batang Balui sereta nyentuk ngagai menua ke dipegai perintah Belanda di Kalimantan. Berindik ari nya, iya endang sesuran bejurai enggau perintah Raja Brooke enduriya mesuka sadang penemu pasal chara mutarka penyerekang antara pupu raban bansa.

Berindik ari pengeran ngau pemuh iya deka nyerakupka semua pupu raban bansa maya nya kelia, Temenggong Koh dipaduka nyadi orang tengah antara perintah Raja Brooke enggau Perintah Belanda ngatur pengawa bebaik antara pupu raban bansa. Berindik ari nya pengawa babachak babi (bebaik) antara bansa Iban enggau bansa Kayan, Kenyah sereta bansa bukai diatur ngena chara aum kena 13 November 1924. Raja Charles Brooke, bala pemesai Perintah Belanda enggau semua pupu raban bansa ken guan Ulu Rajang, Batang Balui enggau kandang menua di Kalimantan bisi ngulu aum tu. Raban bansa Iban betuaika Koh lalu raban bansa Kayan, Kenyah betuaika Ujong Lenjou. Aum tu mujur ngatur pemaik pupu raban bansa.