“Anang tak
kelalu rindang ga kitai ditu. Pukul 8:00 lalu diatu, agi pamaa pejalai kitai
napatka tatai bukit”. Tebah nyawa Pengajar Linggir ngalihka perati kami.
Pengajar Linggir laban ke nyadi pematak altiviti nangga Kuta Rentap, sesuran
awas, nangika laun. Aruh ga pengajar munyi nya, bala mensia ukai belelak, tang
tak beselalat begiga ke bauh babas. Injat, Megong enggau Nyohen nyau rindang
empalang buah sibau raras ke senutuk endar ga maya nya udah bisi midar.
“Nama kita tiga ka tinggal pia?” Ku
Munah ngagau ke sida tiga ke benung mulaska buah sibau. Nyau ngerecam mua sida
ngelaban buah sibau midar.
Kami bekejang ninggalka kaki bukit,
mupuk bejalai nuju kepai tuchung Bukit Sadok. Beringku gaya mensia sama bela
ngema kereban diri. Tudah Nasir laban k emit agi belayan luba nya bepaut
pending mai diri enggau ma iya. Ni enda, taja gamal tudah tak alus tang pama
penegar makai. Bisi empat put sadin ikan nambahka buat ma iya endang ditaga ke
dempa sekumbang ke di menua Bukit Sadok.
“Wat, uji aku nyaup nuan mai sekeda
baut ma nuan, ngetu dulu, kerauh”. Ka malu-malu gaya tudah Nasir nerima tulung
siku orang tuai pangkat aya Pengajar Linggir ke bisi ngemalin pejalai kami.
No comments:
Post a Comment