Tenun

Bangie Anak Embol ari Sungai Kain Baleh, ada dalam taun 1945 udah bulih gelar Indu Gar Tenun. Gelar ti diberi ngagai orang ke diberi basa sereta diaku perintah Malaysia ketegal panteba baka ngembuan penemu enggau pengelandik ngasilka asil pengelandik jari waris pesaka bansa Malaysia. Kelimpah ari nya, ngemera lalu ngerembaika asil pengelandik jari waris pesaka bansa, ngelatih pengawa ngasilka asil pengelandik jari ngagai nembiak rebak baru, sereta ngembuan kreativiti enggau inivasyen nyungkakka kualiti asil pengelandik jari waris pesaka bansa.

Pekara ti ngasuh iya ransing ngerembaika pengawa betenun laban pua kumbu tu pesaka bansa ti patut ditan lalu dikerembaika. Iya deka nyadi anda betenun ti pemadu nyulut sereta deka nyungkaka pengelandik jari orang Iban ngagai tikas ti tinggi ngambika nyadi penatai pemisi ke orang indu ba industri dagang. Pengeransing ati nyadika pengawa betenun ditan lalu dikerembaika ngagai nembiak rebak baru enggau orang ari menua bukai ngujungka iya suah ngatur bengkel enggau ngelatih orang ti deka belajar betenun. Pengelandik iya ngasilka asil pengelandik jari tu pemadu manah sereta ngembuan empas estetik ti tau ngalitka ati.

Sekeda ari buah pua kumbu ti ditenun iyabaka buah Bintang Bekedara, ukir buah pua kumbu ari bungai enggau utai tumbuh baka Sempuyung Matahari. Iya mega ulih ngukur buah pua nitihka peminta orang ti deka meli pua kumbu. Nambahka nya, iya mega ulih ngasilka ukir buah pua kontemporari ti ngemuaska atipemeli menua tu enggau ari menua bukai. Asil tenun ti digaga Bangie ngena ubung taya lalu bisi ngena ubung sutera. Chura ti dikena nyura asil tenun ngena chura asal ari utai tumbuh enggau ngena sintetik ti senang diproses. Sekeda bansa asil tenun iya baka pua kumbu, selampai, pengias, kain kebat enggau sirat. Bangie udah mujur nyereta mayuh aktiviti enggau program ti bisi diatur perintah tauka gerempung luar ketegal deka mandangka pengawa betenun ngagai tikas antarabangsa. Ba taun 1994 – 1995, iya nyadi pematih kelas betenun ti diatur Serakup Indu Dayak Sarawak (SIDS) enggau Serakup Dayak Sarawak (SADIA).

Kelimpah ari nya, iya mega nyadi pematih ngagai bala pematih ba Kraftangan Malaysia. Bangie mega mujur nyereta pengawa pemandang bantai assil betenun bad alma enggau luar nengeri.

Sekeda ari pemandang bantai asil nya baka nyereta chara betenun pua kumbu ba Ethnographis Museum, Sweden ba taun 1999. Nyereta pemandang bantai asil ba Paris, Bangkok, Manila, Singapore enggau endur ti bukai. Ba taun 1998, iya bulih lumur satu pekit nyura ngena chura pua kumbu ti diatur UNESCO di Bangkok.

Ba taun 2000, iya bulih gelar Indu Gar Indau Takar ari Gerempung Kraftangan Malaysia. Pemandai enggau pengelandik iya betenun balat narit ati mensia mayuh baikka peranak menua Malaysia enggau peranak menua bukai ti sama deka meli lalu ngibun asil tetun iya.  

Dibali ari buku teks bahasa iban pom 1