Bah Tunggal

Pemansang global majak nyungkak ari sehari ke sehari. Taja pia, kurang bendar mensia betatika aktiviti pemansang ke dipejalaika nyadi siti batang faktor ke ngenanka fenomena pengudi menua. Siti ari fenomena ke nyadi isu nasional diatu iya nya bah tunggal. Faktor dominan penyadi bah tunggal iya nya ulah mensia ke lebih ngemeratka pemansang modenisasyen dibandingka enggau pengangkun ke kualiti rampa menua. Pengawa ngerumpang tanah kampung endur nudukka pemansang enggau ngaga rumah udah nagang aktiviti nyerap ai ujan. Ai ujan ke enda diserap tanah deka bedujuh rarat ngagai sungai tauka lupak ke ngujungka penyadi ba tunggal.

Kelimpah ari nya, chara bumai betanam ti enda sistematik sereta digaga ba kandang menua bebukit mega bepotensial ngasuh ba tunggal nyadi. Menua bukit ke dikelitika deka ngujungka pengerarat ai jampat agi bedujuh napatka sungai, lupak tauka lebak. Ukai semina nya aja, tanah tusur mega tau nyadi laba urat kayu ke bempu pengawa nanggam lalu ngenanka tanah udah nadai agi. Nangkan ke nya, ulah mensia ke ngambi jalai muntang bebuaika uras ke sungai mega nambahka risiko penyadi bah tunggal. Uras ke majak mayuh semayuh betakat keda ngempang pengelanchar pengerarat ai. Nya kebuah enti lebuh ujan bangat sungai enda ulih nerima isi ai ke lebih. Pekara tu deka ngujungka genturung menua ke semak sungai deka ampuh laban bah tunggal.

Ukai semina nya aja sistem pengerarat ai ke enda  befungsyen mega tau ngasuh bah tunggal nyadi. Ulah mensia ke enda beradat ba genturung pendiau ke muai uras ngagai parit ngujungka arus pengerarat ai betekat. Tambah mega sida endang nadai inisiatif deka ngelasi sereta meresi parit ke ngujungka risiko diampuhka bah tunggal besai agi.